തമിഴ്​നാട്ടിൽ മൂന്ന്​ മാസത്തേക്ക്​ മദ്യശാലകൾ അടച്ചിടണമെന്ന്​ ഹൈകോടതി

ചെന്നൈ: മൂന്ന് മാസത്തേക്ക് മദ്യഷോപ്പുകൾ അടച്ചിടാൻ തമിഴ്നാട് സർക്കാരിനോട് മദ്രാസ് ഹൈകോടതി ഉത്തരവിട്ടു. ദേശീയ പാതയിൽ നിന്ന് 500 മീറ്റർ പരിധിയിൽ മദ്യശാലകൾ പാടില്ലെന്ന സുപ്രീംകോടതി വിധി മറികടക്കാനുള്ള ശ്രമത്തിനെതിരെ ഡി.എം.കെ നൽകിയ ഹരജിയിലാണ് ഉത്തരവ്.

ദേശീയ- സംസ്ഥാന പാതകൾ ജില്ല കോർപ്പറേഷൻ പാതകളായി പരിവർത്തനം ചെയ്യാനുള്ള സംസ്ഥാന സർക്കാർ ശ്രമം തടയണമെന്നാവശ്യപ്പെട്ടാണ് ഡി.എം.കെ ഹൈകോടതിയെ സമീപിച്ചത്. സുപ്രീംകോടതി വിധി മറികടക്കാനാണ് ദേശീയ-സംസ്ഥാന പാതകൾ പുനർനാമകരണം ചെയ്യുന്നതെന്നാണ് ഡി.എം.കെയുടെ വാദം.

ദേശീയ-സംസ്ഥാന പാതയോരങ്ങളിലെ മദ്യശാലകൾ ഏപ്രിൽ ഒന്നു മുതൽ അടച്ചിടണമെന്ന് സുപ്രീംകോടതി ഉത്തരവിട്ടിരുന്നു. എക്സൈസ് വർഷം മാർച്ചിൽ അവസാനിക്കുന്ന എല്ലാ സംസ്ഥാനങ്ങൾക്കും ഉത്തരവ് ബാധകമാക്കിയിരുന്നു.