'പാകിസ്​താൻ ഭക്ഷ്യമേള'ക്കെതിരെ ബജ്​രംഗ്​ദൾ; ബാനർ കത്തിച്ചു, ഹോട്ടലുടമയ്​ക്ക്​ ഭീഷണി

സൂറത്ത്​: ഗുജറാത്തിലെ സൂറത്തിൽ 'പാകിസ്​താൻ ഫുഡ്​ ഫെസ്റ്റിവൽ' നടത്താനൊരുങ്ങിയ ഹോട്ടലുടമയ്​ക്ക്​ തീവ്ര ഹിന്ദുത്വ സംഘടനയായ ബജ്​രംഗ്​ദളിന്‍റെ ഭീഷണി. റെസ്​റ്റാറന്‍റിൽ പാകിസ്​താൻ ഭക്ഷണം വിളമ്പിയാൽ അതിന്‍റെ പ്രത്യാഘാതം അനുഭവിക്കേണ്ടിവരുമെന്ന്​ ഹോട്ടലുടമ സന്ദീപ്​ ദവറിനെ ബജ്‌രംഗ്ദൾ നേതാവ് ദേവിപ്രസാദ് ദുബെയും സംഘവും ഭീഷണിപ്പെടുത്തി. ഹോട്ടലിനു മുന്നിൽ സ്​ഥാപിച്ച 'പാകിസ്​താൻ ഭക്ഷ്യമേള' ബാനർ അക്രമി സംഘം പരസ്യമായി കത്തിച്ചു. ജയ്​ശ്രീറാം ആക്രോശിച്ച്​ ബാനർ കത്തിക്കുന്നതിന്‍റെ വിഡിയോ സമൂഹമാധ്യമങ്ങളിൽ പ്രചരിക്കുന്നുണ്ട്​.

സൂറത്തിൽ നിരവധി റെസ്റ്റാറന്‍റുകൾ നടത്തുന്ന 'ടേസ്റ്റ് ഓഫ് ഇന്ത്യ'യുടെ ബോർഡാണ്​ ഇവർ നശിപ്പിച്ചത്​. ഡിസംബർ 12 മുതൽ 22 വരെ മേള നടത്താനായിരുന്ന തീരുമാനം. എന്നാൽ, ഇതേക്കുറിച്ച്​ കോൺഗ്രസ് അംഗമായ മുൻ സൂറത്ത് സിറ്റി കൗൺസിലർ അസ്​ലം സൈക്കിൾവാല വീഡിയോ എടുത്ത്​ ഫേസ്ബുക്കിൽ അപ്‌ലോഡ് ചെയ്തതോടെ ബജ്​രംഗ്​ദൾ ഏറ്റുപിടിക്കുകയായിരുന്നു.

മേളയെക്കുറിച്ച് സോഷ്യൽ മീഡിയയിൽ നിന്നാണ് അറിഞ്ഞതെന്ന് ബജ്‌രംഗ്​ദൾ നേതാവ് ദേവിപ്രസാദ് ദുബെ പറഞ്ഞു. "എന്തിനാണ് പാകിസ്​താൻ ഭക്ഷ്യമേള സംഘടിപ്പിച്ചതെന്ന് അയാളോട്​ ചോദിച്ചിരുന്നു. മേള നടത്താൻ തീരുമാനിച്ച ഡിസംബർ 12 നും 22നും ഇടയിൽ ഞങ്ങളുടെ പ്രവർത്തകരെ ഹോട്ടലിലേക്ക്​ രഹസ്യമായി അയയ്ക്കും. റെസ്റ്റോറന്‍റിൽ പാകിസ്​താൻ ഭക്ഷണം വിളമ്പിയാൽ അതിന്‍റെ അനന്തരഫലങ്ങൾക്ക് താൻ ഉത്തരവാദിയായിരിക്കുമെന്ന് ഞങ്ങൾ ഹോട്ടലുടമ സന്ദീപ്​ ദവറിന്​ മുന്നറിയിപ്പ്​ നൽകിയിട്ടുണ്ട്​'' -ദുബെ പറഞ്ഞു.

അതേസമയം, റസ്റ്റോറന്‍റ്​ ഉടമയ്ക്ക് ബി.ജെ.പിയുമായി അടുത്ത ബന്ധമുണ്ടെന്നും റസ്റ്റോറന്‍റിന്‍റെ ലൈസൻസ് റദ്ദാക്കണമെന്നും അസ്​ലം സൈക്കിൾവാല പറഞ്ഞതായി ദി ഇന്ത്യൻ എക്സ്പ്രസ് റിപ്പോർട്ട് ചെയ്തു. "ഇത്തരമൊരു മേള ഏതെങ്കിലും ഒരു മുസ്​ലിം ഉടമസ്​ഥതയിലുള്ള ഹോട്ടലിലാണ്​ നടത്തിയിരുന്ന​െങ്കിൽ എന്തായിരിക്കും അവസ്​ഥ? ഇവിടെ ബി.ജെ.പിയുമായി അടുത്ത ബന്ധമുള്ള ഉടമയായതിനാൽ അദ്ദേഹത്തിനെതിരെ നടപടിയെടുക്കാൻ സാധ്യതയില്ല' -അസ്​ലം സൈക്കിൾവാല പറഞ്ഞു.

അതിനിടെ, തന്‍റെ ഹോട്ടലിൽ നടത്താൻ തീരുമാനിച്ച പാകിസ്​താൻ ഭക്ഷ്യമേള ഭീഷണി​െയ തുടർന്ന്​ റദ്ദാക്കിയതായും പകരം കടൽവിഭവങ്ങളുടെ മേള സംഘടിപ്പിക്കുമെന്നും ഹോട്ടലുടമ മാധ്യമങ്ങളോട്​ പറഞ്ഞു. 'ഭക്ഷണം ലോകത്ത് എല്ലായിടത്തും സാധാരണ കാര്യമാണ്​​. എന്‍റെ റെസ്റ്റോറന്‍റ്​ പാകിസ്​താനെതിരല്ല. ഇന്ത്യയ്‌ക്കെതിരായ അവരുടെ രാഷ്ട്രീയ നിലപാടുകളോട്​ എതിർപ്പുണ്ട്​. ഞങ്ങൾ പാകിസ്​താനിൽനിന്നുള്ള പാചകക്കാരനെ ക്ഷണിച്ചിട്ടില്ല. ഞങ്ങളുടെ തന്നെ ജീവനക്കാർ ഓൺലൈൻ വീഡിയോകളിലൂടെ പഠിച്ചെടുത്ത മെനുവാണ്​ ഭക്ഷണപ്രേമികൾക്കായി തയ്യാറാക്കുന്നത്​' സന്ദീപ്​ വ്യക്​തമാക്കി.