കുട്ടികളെ വിറ്റ സംഭവത്തിൽ കുറ്റസമ്മതവുമായി കന്യാസ്​ത്രീ

റാഞ്ചി: ഝാർഖണ്ഡി​ലെ ഷെൽട്ടർ ഹോമിൽ കുട്ടികളെ വിറ്റ സംഭവത്തിൽ കുറ്റസമ്മതവുമായി കന്യാസ്​ത്രീ. മിഷണറി ഒാഫ്​ ചാരിറ്റിയുമായി ബന്ധപ്പെട്ട്​ പ്രവർത്തിക്കുന്ന കന്യാസ്​ത്രീയാണ്​ കുട്ടികളെ വിറ്റിട്ടുണ്ടെന്ന്​ സമ്മതിച്ചത്​. മിഷണറി ഒാഫ്​ ചാരിറ്റിയിലെ കന്യാസ്​ത്രീയായ കൊൺസെല​ കുറ്റസമ്മതം നടത്തുന്ന വീഡിയോയും പുറത്ത്​ വന്നിട്ടുണ്ട്​. മൂന്ന്​ കുട്ടികളെ വിറ്റുവെന്നും മറ്റൊരു കുട്ടിയെ സൗജന്യമായി നൽകിയെന്നുമാണ്​ കുറ്റസമ്മത മൊഴിയിലുള്ളത്​.

മദർ തെരേസ ചാരിറ്റിയുടെ നേതൃത്വത്തിലുള്ള നിർമൽ ഹൃദയ്​ എന്ന സ്ഥാപനത്തിൽ നിന്ന്​ കുട്ടികളെ വിറ്റുവെന്നാണ്​ പരാതി. കൊൺസെല​യെ കൂടാതെ അനിമ ഇൻഡ്​വാർ എന്ന കന്യാസ്​ത്രീയും കേസിൽ പ്രതിയാണ്​.

സംസ്ഥാനത്തുടനീളം മിഷൻ ഒാഫ്​ ചാരിറ്റിക്ക്​ ഷെൽട്ടർ ഹോമുകളുണ്ട്​. എങ്കിലും റാഞ്ചിയിലെ ഷെൽട്ടർ ഹോം കേന്ദ്രീകരിച്ചാണ്​ തട്ടിപ്പ്​ നടന്നതെന്നാണ്​ സൂചന. നേരത്തെ കുട്ടികളെ വിറ്റ സംഭവത്തിൽ അന്വേഷണത്തെ വിമർശിച്ച്​ ഝാർഖണ്ഡ്​ ബിഷപ്പ്​ രംഗത്തെത്തിയിരുന്നു.