അയോധ്യ റെയിൽവേ സ്​റ്റേഷൻ പ്രവൃത്തി മാർച്ച്​ 22ന്​ പൂർത്തിയാകും; നിർമാണം രാമക്ഷേത്ര മാതൃകയിൽ

അയോധ്യ: നിയമസഭ തെരഞ്ഞെടുപ്പിന്​ മുന്നോടിയായി അയോധ്യയിലെ റെയിൽവേ സ്റ്റേഷൻ പുനരുദ്ധാരണ പ്രവൃത്തി പൂർത്തിയാക്കാനുറച്ച്​ ബി.ജെ.പി സർക്കാർ. രാമക്ഷേത്രത്തിൽനിന്ന് പ്രചോദനം ഉൾക്കൊണ്ടാണ് റെയിൽവേ സ്റ്റേഷന്‍റെ പുനർനിർമാണം നടക്കുന്നത്​. 2018ൽ ആരംഭിച്ച​ നിർമാണം 2022 മാർച്ച് 22ന് പൂർത്തീകരിക്കും.

അത്യാധുനിക സംവിധാനങ്ങളോടുകൂടി പണി കഴിപ്പിക്കുന്ന റെയിൽവേ സ്റ്റേഷന്‍റെ ആദ്യഘട്ട നിർമാണത്തിന്​ ഏകദേശം 126 കോടി രൂപയും രണ്ടാം ഘട്ടത്തിന്​ 300 കോടി രൂപയുമാണ്​ ചെലവ്. പത്ത്​ ലക്ഷം യാത്രക്കാരെ ഉൾക്കൊള്ളാവുന്ന രീതിയിലാണ്​ സ്​റ്റേഷന്‍റെ നിർമാണം.

1400 സ്ക്വയർ മീറ്റർ വിസ്തീർണമുള്ള കാത്തിരിപ്പ് കേന്ദ്രം, 14 റിട്ടയർമെന്‍റ്​ റൂം, 76 ഡോർമിറ്ററികൾ തുടങ്ങിയവ സ്റ്റേഷനുള്ളിലുണ്ടാകും. 76 ഡോർമിറ്ററികൾ പുരുഷന്മാർക്കും സ്ത്രീകൾക്കുമായി 44, 32 എന്നിങ്ങനെ സജ്ജീകരിക്കും. സ്റ്റേഷന്‍റെ താഴത്തെ നിലയിലും ഒന്നാം നിലയിലുമായി ഫുഡ് പ്ലാസകൾ ഒരുക്കുമെന്നും അധികൃതർ അറിയിച്ചു. നാല് എലിവറേറ്റുകളും ആറ് എസ്കലേറ്ററുകളും സ്റ്റേഷനകത്തുണ്ടാകും.

രാമക്ഷേത്ര നിർമാണത്തിനുപയോഗിക്കുന്ന അതേ കല്ലുകളാണ്​ സ്റ്റേഷന്‍റെ നിർമാണത്തിനും ഉപയോഗിക്കുന്നത്​. രാജ്യത്തിന്‍റെ വിവിധ ഭാഗങ്ങളിൽ നിന്നെത്തുന്ന ഭക്തർക്ക് അയോധ്യയിലെത്തിച്ചേരാനായി കൂടുതൽ ട്രെയിനുകൾ ഈ റൂട്ടിൽ ഉൾപ്പെടുത്തുമെന്നും അധികൃതർ വ്യക്തമാക്കി.

പ്രദേശത്തെ തിരക്ക് നിയന്ത്രിക്കാൻ പുതിയ റോഡുകളും അയോധ്യയിൽ നിർമിക്കും. വിശാലമായ പാർക്കിങ് സൗകര്യമാണ് സ്റ്റേഷന് മുന്നിൽ ഒരുക്കുന്നത്. 134 കാറുകളും 68 ഓട്ടോകളും 96 ​ബൈക്കുകളും പാർക്ക്​ ചെയ്യാനുള്ള സൗകര്യമുണ്ടാകും. നിലവിൽ 22 മെയിലുകളും എക്സ്​പ്രസ്​ ട്രെയിനുകളും ആയോധ്യ വഴി കടന്നുപോകുന്നുണ്ട്​. ആറ്​ പാസഞ്ചർ ട്രെയിനുകളും ഇതിലൂടെ സർവിസ്​ നടത്തുന്നു. യു.പി നിയമസഭ തെരഞ്ഞെടുപ്പിന്‍റെ മുന്നോടിയായിട്ട് വിമാനത്താവളമടക്കം​ നിരവധി വികസന പദ്ധതികളാണ്​ ബി.ജെ.പി സർക്കാർ പ്രഖ്യാപിച്ചിട്ടുള്ളത്​.