ബാബരി ഭൂമിതർക്ക കേസ്​: മധ്യസ്ഥത പരാജയപ്പെട്ടു; വാദം കേൾക്കൽ​ ആറ്​ മുതൽ

ന്യൂഡൽഹി: അയോധ്യ ഭൂമിതർക്ക കേസിലെ മധ്യസ്ഥ ശ്രമങ്ങൾ പരാജയപ്പെട്ടതായി സുപ്രീംകോടതി അറിയിച്ചു. ആഗസ്​റ്റ്​ ആറ്​ മുതൽ കേസിലെ വാദം കേൾക്കുമെന്നും സുപ്രീംകോടതി വ്യക്​തമാക്കി. സുപ്രീംകോടതി മുൻ ജഡ്ജി എഫ്.എം.ഐ ഖലീഫുല്ലയുടെ നേതൃത്വത്തിലുള്ള സമിതിയാണ്​ കേസിൽ മധ്യസ്ഥത വഹിച്ചത്​. ജീവനകല ആചാര്യൻ ശ്രീ ശ്രീ രവിശങ്കർ, മുതിർന്ന അഭിഭാഷകൻ ശ്രീറാം പഞ്ചു എന്നിവരാണ് സമിതിയിലെ മറ്റംഗങ്ങൾ.

ആഗസ്​റ്റ്​ ആറ്​ മുതൽ ദിവസവും വാദം കേൾക്കാനാണ്​ സുപ്രീംകോടതി തീരുമാനം. ചീഫ് ജസ്റ്റിസ് രഞ്ജൻ ഗൊഗോയ് അധ്യക്ഷനായ ഭരണഘടന ബെഞ്ചാണ്​ കേസ്​ പരിഗണിക്കുന്നത്​. ചീഫ്​ ജസ്​റ്റിസിന്​ പുറമെ എസ്​.എ ബോംബ്​ഡേ, ഡി.വൈ ചന്ദ്രചൂഡ്​ എന്നിവരാണ്​ കേസ്​ പരിഗണിക്കുന്ന ബെഞ്ചിലെ മറ്റംഗങ്ങൾ.

സമിതിയുടെ റിപ്പോർട്ട് സീൽ ചെയ്ത കവറിൽ വ്യാഴാഴ്ച കോടതിക്ക് സമർപ്പിച്ചത്​. ജൂലൈ 11നും സുപ്രീംകോടതി കേസിലെ മധ്യസ്ഥയിലുള്ള പുരോഗതി വിലയിരുത്തിയിരുന്നു.