കർഷക പ്രക്ഷോഭം തുടരുന്ന സിംഘു അതിർത്തിയിൽ വെടിവെപ്പ്​

ന്യൂഡൽഹി: കർഷക പ്രക്ഷാഭം തുടരുന്ന ഡൽഹി-ഹരിയാന അതിർത്തിയായ സിംഘുവിൽ അജ്ഞാർ വെടിയുതിർത്തതായി കർഷകർ. ഞായറാഴ്ച രാത്രിയാണ്​ സംഭവം.

കാറിലെത്തിയ അജ്ഞാതസംഘം ആകാശത്തേക്ക്​ വെടിയുതിർക്കുകയായിരുന്നു. പ്രതിഷേധ സ്​ഥലത്തിന്​ സമീപം ഭക്ഷണ വിതരണം നടക്കുന്നതിനിടെയാണ്​ സംഭവം​. അക്രമികൾ പ്രക്ഷോഭ സ്​ഥലത്തേക്ക്​ എത്തിയത്​ പഞ്ചാബ്​ രജിസ്​ട്രേഷൻ കാറിലാണെന്ന്​ പൊലീസ്​ പറഞ്ഞു.

വെടിവെപ്പ്​ നടന്നതോടെ ഹരിയാന പൊലീസ്​ സ്​ഥലത്തെത്തി അന്വേഷണം ആരംഭിച്ചു.

അന്താരാഷ്​ട്ര വനിത ദിനത്തോടനുബന്ധിച്ച്​ ആയിരക്കണക്കിന്​ വനിത കർഷകർ ട്രാക്​ടറുകളിൽ ഡൽഹിയിലേക്ക്​ തിരിക്കുന്നതിനിടെയാണ്​ സംഭവം. കർഷക സ്​ത്രീകളുടെ നേതൃത്വത്തിൽ തിങ്കളാഴ്ച മാർച്ചും സംഘടിപ്പിക്കും.