കർഷക പ്രതികാരം; ട്വിറ്ററിൽ ട്രെൻഡിങ്ങായി 'ബി.ജെ.പിക്ക്​ വോട്ടില്ല'

ന്യൂഡൽഹി: കേന്ദ്രസർക്കാറിന്‍റെ കാർഷിക നിയമങ്ങൾക്കെതിരായ കർഷക പ്രക്ഷോഭത്തിനിടെ ട്വിറ്ററിൽ ട്രെൻഡിങ്ങായി 'ബി.ജെ.പിക്ക്​ വോട്ടില്ല' ഹാഷ്​ടാഗ്​. അഞ്ചു സംസ്​ഥാനങ്ങളിൽ നിയമസഭ തെരഞ്ഞെടുപ്പ്​ അടുത്തിരിക്കേ 'നോ വോട്ട്​ ടു ബി.ജെ.പി' എന്ന ഹാഷ്​ടാഗാണ്​ ട്വിറ്ററിൽ ട്രെൻഡിങ്​.

നിരവധിപേർ ഹാഷ്​ടാഗ്​ പങ്കുവെച്ച്​ കേന്ദ്രസർക്കാറി​ന്‍റെ ജനവിരുദ്ധ നയങ്ങ​ൾക്കെതിരെ ട്വീറ്റ്​ ചെയ്​തു. പശ്ചിമ ബംഗാൾ നിയമസഭ തെരഞ്ഞെടുപ്പിൽ കർഷക സംഘടനകളുടെ നേതൃത്വത്തിൽ ബി.ജെ.പിക്കെതിരെ പ്രചാരണം ആരംഭിച്ചിരുന്നു. കർഷക ദ്രോഹ നയങ്ങൾക്കെതിരെ ജനങ്ങൾ ഒന്നിക്കണമെന്ന്​ ആഹ്വാനം ചെയ്​താണ്​ കർഷകരുടെ പ്രചാരണം.

ബംഗാളിൽ കർഷകരുടെ നേതൃത്വത്തിൽ ബി.ജെ.പിക്ക്​ വോട്ടില്ല എന്ന പ്രചാരണ വാക്യവുമായി പ്രകടനം നടത്തുകയും ചെയ്​തിരുന്നു. ഇതിനോടനുബന്ധിച്ചാണ്​ 'നോ വോട്ട്​ ടു ബി.ജെ.പി' പ്രതി​േഷധം ട്വിറ്ററിലും ഉയർന്നത്​.

2022ഒാടെ കർഷകരുടെ വരുമാനം ഇരട്ടിയാക്കുമെന്നായിരുന്നു മോദി സർക്കാറിന്‍റെ വാഗ്​ദാനം. എന്നാൽ കർഷക സമൂഹത്തിന്​ കുഴിമാടം ഒരുക്കുകയാണ്​ യഥാർഥത്തിൽ മോദി സർക്കാർ ചെയ്യുന്നതെന്നും കർഷകർ ആരോപിച്ചു. കർഷകർ മാത്രമല്ല രാജ്യത്തെ ജനങ്ങൾ മുഴുവൻ കാമ്പയിനിന്​ പിന്തുണയുമായി എത്തണമെന്നും കർഷകർ പറയുന്നു.