അസം മുൻ മുഖ്യമ​ന്ത്രി സയ്യിദ അന്‍വാറ തൈമൂര്‍ അന്തരിച്ചു

ഗുവാഹത്തി: അസം ചരിത്രത്തിലെ ഏക വനിതാ മുഖ്യമന്ത്രിയായിരുന്ന സയ്യിദ അന്‍വാറ തൈമൂര്‍ (84) അന്തരിച്ചു. ഹൃദയാഘാതത്തെ തുടര്‍ന്ന് ആസ്‌ത്രേലിയയില്‍ ​െവച്ചായിരുന്നു അന്ത്യം.

സ്വതന്ത്ര ഇന്ത്യയിലെ ഏക വനിത മുസ്​ലിം മുഖ്യമന്ത്രിയാണ്​ അൻവാറ തൈമൂർ. കോൺഗ്രസ്​ ടിക്കറ്റിൽ നാല്​ തവണ നിയമസഭയിലെത്തിയ അവർ 1980 മുതല്‍ 1981 ജൂണ്‍ വരെയാണ്​ അസം മുഖ്യമന്ത്രിയായിരുന്നത്​. 1972, 1978, 1983, 1991 വര്‍ഷങ്ങളിലാണ് തൈമൂര്‍ എം.എൽ.എയായി തിരഞ്ഞെടുക്കപ്പെട്ടത്. രണ്ടു തവണ മന്ത്രിയാവുകയും ചെയ്​തു. രണ്ടുതവണ രാജ്യസഭ എം.പിയും ആയിട്ടുണ്ട്. 1988 ല്‍ നാമനിർദേശം ചെയ്യപ്പെടുകയും 2004ല്‍ തിരഞ്ഞെടുക്കപ്പെടുകയും ആയിരുന്നു.

കോണ്‍ഗ്രസ് ടിക്കറ്റ് നിഷേധിച്ചതിനെ തുടര്‍ന്ന് 2011ല്‍ അവർ ബദറുദ്ദീൻ അജ്മലി​െൻറ നേതൃത്വത്തിലുള്ള എ.ഐ.യു.ഡി.എഫില്‍ ചേര്‍ന്നു. രാഷ്​ട്രീയത്തിലെത്തുംമുമ്പ് കോളജ് അധ്യാപികയായിരുന്നു. ആസ്​ത്രേലിയയിൽ മകനോടൊടൊപ്പം വിശ്രമ ജീവിതം നയിച്ചുവരികെയായിരുന്നു അന്ത്യം.

മുന്‍ അസം മുഖ്യമന്ത്രി സയ്യിദ അന്‍വാറ തൈമൂറി​െൻറ നിര്യാണത്തിൽ പ്രധാനമന്ത്രി നരേന്ദ്ര മോദി അനുശോചിച്ചു. 'ആസമി​െൻറ വികസനത്തിന് അവര്‍ നല്‍കിയ സംഭാവനകള്‍ ഓര്‍മ്മിക്കപ്പെടും. അവരുടെ ആത്മാവ് സമാധാനത്തോടെ ഇരിക്കട്ടെ'- അദ്ദേഹം ട്വിറ്ററിൽ കുറിച്ചു.