ബി.ജെ.പി ഭരിക്കുന്ന അസമിൽ മുസ്​ലിം ഭൂരിപക്ഷ പ്രദേശങ്ങളിലെ ജനനനിരക്ക്​ നിയന്ത്രിക്കാൻ 'ജനസംഖ്യ പട്ടാളം' വരുന്നു

ഗുവാഹതി: ബി.ജെ.പി വീണ്ടും അധികാരത്തിലേറിയ അസമിൽ മുസ്​ലിം ജനസംഖ്യ കുറക്കാൻ 'ജനസംഖ്യ പട്ടാള'ത്തിന്​ ചുമതല നൽകി സർക്കാർ. മുസ്​ലിം ഭൂരിപക്ഷ പ്രദേശങ്ങളിൽ ഗർഭനിരോധന ഉറകൾ വിതരണം ചെയ്​തും ബോധവത്​കരണം നടത്തിയും ജനസംഖ്യ വർധിക്കുന്നില്ലെന്ന്​ ഉറപ്പുവരുത്തി 'ജനസംഖ്യ പട്ടാളം' സജീവമാക്കുമെന്ന്​ മുഖ്യമന്ത്രി ഹിമന്ത ബിശ്വാസ്​ നിയമസഭയിൽ അറിയിച്ചു. ലോവർ അസമിലാണ്​ 1,000 പേരടങ്ങുന്ന സേനയെ പ്രയോജനപ്പെടുത്തുക. നേരത്തെ മുസ്​ലിംകകൾക്ക്​ ക്ഷേമപദ്ധതികൾ ലഭിക്കാൻ രണ്ടുകുട്ടികൾ കൂടരുതെന്ന നിയമം നിർബന്ധമാക്കി വിവാദം സൃഷ്​ടിച്ച സർക്കാർ കടുത്ത നടപടികൾ തുടരുന്നതിന്‍റെ ഭാഗമാണ്​ പുതിയ നീക്കം. സഭയിൽ കോൺഗ്രസ്​ അംഗം ശർമാൻ അലിയുടെ ചോദ്യങ്ങൾക്ക്​ മറുപടിയിലാണ്​ മുസ്​ലിം പ്രദേശങ്ങൾ കേന്ദ്രീകരിച്ച്​ ജനസംഖ്യ കുറക്കൽ യജ്​ഞം ആരംഭിക്കുന്നതായി മുഖ്യമന്ത്രി അറിയിച്ചത്​.

അസമിന്‍റെ പശ്​ചിമ, മധ്യ മേഖലകളിൽ ജനസംഖ്യ വിസ്​ഫോടനമാണ്​ നടക്കുന്നതെന്ന്​ ഹിമന്ത പറഞ്ഞു. ''1,000 യുവാക്കളെ ​ജനസംഖ്യ ബോധവത്​കരണത്തിനും ഗർഭനിരോധന ഉറകൾ വിതരണത്തിനുമായി ചുമതലപ്പെടുത്തും. ഇതേ ദൗത്യവുമായി പ്രത്യേക 'ആശ വർകർമാ​രുടെ' വിഭാഗവും സജ്ജമാകും. 2001 മുതൽ 2011 വരെ ഹിന്ദുക്കളിൽ ജനസംഖ്യ വർധന 10 ശതമാനമാണെങ്കിൽ മുസ്​ലിംകളിൽ അത്​ 29 ശതമാനമാണ്​. ഹിന്ദുക്കളിൽ നേരത്തെ 16 ശതമാനമായിരുന്നതാണ്​ കുറഞ്ഞത്​. ഇത്​ അസമിലെ മുസ്​ലിംകളിൽ പട്ടിണിയും കടുത്ത സമ്മർദവും സൃഷ്​ടിക്കുന്നുണ്ട്​. ജനസംഖ്യ ചെറുതായതിനാൽ, ഹിന്ദുവിന്‍റെ മക്കൾ മികച്ച സ്​കൂളുകളിലും കോളജുകളിലും പഠിക്കുന്നു, പലരും ഡോക്​ടർമാരും എഞ്ചിനിയർമാരുമായി. സമ്മർദം കടുത്തതോടെ മുസ്​ലിംകൾ വനമേഖലകളിലും സർക്കാർ ഭൂമികളിലും താമസിക്കുന്നിട​െത്തത്തി. ഇത്​ തർക്കങ്ങൾക്കിടയാക്കുന്നു''- മുഖ്യമന്ത്രി കൂട്ടിച്ചേർത്തു.

''നിരവധി മുസ്​ലിം പെൺകുട്ടികൾ 18-19 വയസ്സാകു​േമ്പാഴേക്ക്​ മൂന്ന്​, നാല്​ കുട്ടികളുടെ അമ്മയാകുന്നു. വിദ്യാഭ്യാസമില്ലാത്ത നിരവധി മുസ്​ലിം യുവതികൾ ​മനുഷ്യക്കടത്തുസംഘങ്ങളുടെ പിടിയിലാകുന്നു. ഇവരെ കേരളം പോലുള്ള സംസ്​ഥാനങ്ങളിൽ ലൈംഗിക വ്യാപാരത്തിന്​ ഉപയോഗപ്പെടുത്തുകയാണ്​''- ഹിമന്ത തുടർന്നു.

മുസ്​ലിംകളിൽ ജനസംഖ്യ നിയന്ത്രണം വരുത്തി പട്ടിണിയും നിരക്ഷരതയും ഭൂമി പ്രതിസന്ധിയും ഇല്ലാതാക്കുകയും അവർക്ക്​ ഉപജീവനം നൽകുകയുമാണ്​ ലക്ഷ്യമെന്നും ഈ മേഖലകളിൽ പുതുതായി ഒമ്പത്​ കോളജുകൾ അനുവദിച്ചിട്ടുണ്ടെന്നും പെൺകുട്ടികളുടെ വിദ്യാഭ്യാസം ഉറപുവരുത്താൻ അതിലേറെ സ്​ഥാപനങ്ങൾ അനുവദിക്കുമെന്നും മുഖ്യമന്ത്രി പറഞ്ഞു.

നിർബന്ധിതമല്ലാതെയെന്ന്​ പറയുന്ന വന്ധ്യംകരണവും രണ്ടുകുട്ടികളിൽ കൂടരുതെന്ന നിയമം കർശനമായി നടപ്പാക്കലുമുൾപെടെ സംസ്​ഥാനത്ത്​ ബി.ജെ.പി സർക്കാർ കടുത്ത നടപടികളുമായി മുന്നോട്ടാണ്​. അയൽസംസ്​ഥാനമായ യു.പിയും ഇതേ മാതൃക പിൻപറ്റാനുള്ള നടപടികൾക്ക്​ തുടക്കമായിട്ടുണ്ട്​.