അസം തെരഞ്ഞെടുപ്പ്: മോദിയെ പ്രതിരോധിക്കാൻ നാളെ മുതൽ ​പ്രിയങ്കയുടെ പ്രചാരണം

ഗുവാഹത്തി: വരുന്ന നിയമസഭ തെരഞ്ഞെടുപ്പിനോടനുബന്ധിച്ച്​ കോൺഗ്രസ് ജനറൽ സെക്രട്ടറി പ്രിയങ്ക ഗാന്ധി തിങ്കളാഴ്ച അസമിലെത്തും. രണ്ട് ദിവസത്തെ സന്ദർശന വേളയിൽ, ബ്രഹ്മപുത്ര നദിയുടെ വടക്കൻ തീരത്തെ ജില്ലകളിൽ അവർ പ്രചാരണത്തിന്​ നേതൃത്വം നൽകും. ഗുവാഹത്തിയിലെത്തുന്ന ​പ്രിയങ്ക ആദ്യം കാമാഖ്യ ക്ഷേത്രത്തിൽ പ്രാർഥന നിർവഹിക്കും​. തുടർന്ന്​ തെരഞ്ഞെടുപ്പ്​ പ്രചാരണത്തിനായി ലഖിംപുരിലേക്ക് പറക്കും.

പൗരത്വ ഭേദഗതി നിയമത്തിനെതിരെ കടുത്ത പ്രതിഷേധത്തിന് സാക്ഷ്യം വഹിച്ച മേഖലയാണ്​ അസമിലെ വടക്കൻ ഭാഗങ്ങൾ. 2019ൽ സി.എ.എക്കെതിരെ ഇവിടെ രണ്ടുമാസം നീണ്ടുനിന്ന പ്രക്ഷോഭങ്ങൾ അര​േങ്ങറിയിരുന്നു. എന്നാൽ, ജനവികാരം സർക്കാറിനെതിരായതോടെ നിരവധി വികസന പദ്ധതികളാണ്​ ബി.ജെ.പി ഇവിടെ പ്രഖ്യാപിച്ചിരിക്കുന്നത്​​.

പ്രധാനമന്ത്രി നരേന്ദ്ര മോദിയുടെ തുടർച്ചയായ മൂന്ന് സന്ദർശനങ്ങൾക്ക് ശേഷമാണ്​ പ്രിയങ്ക ഗാന്ധി അസമിലെത്തുന്നത്​. ലഖിംപുർ, ബിഹ്പുരിയ, ബിസ്വനഥ്, തേസ്പൂർ എന്നീ നാല്​ നിയമസഭ മണ്ഡലങ്ങളിൽ ഇവർ​ പ്രചാരണം നടത്തും. പാർട്ടി യോഗങ്ങളിൽ പങ്കെടുക്കുകയും പ്രതിഷേധ റാലിക്ക് നേതൃത്വം നൽകുകയും ചെയ്യും. കൂടാതെ ബിശ്വനാഥിലെ സാധരി ടീ എസ്റ്റേറ്റിലെ വനിതാ തേയില തൊഴിലാളികളുമായി ആശയവിനിമയം നടത്തും.

രാഹുൽ ഗാന്ധിയും ഫെബ്രുവരിയിൽ അസമിലെത്തിയിരുന്നു. അദ്ദേഹം സി.എ.എ വിരുദ്ധ സമരത്തിന്‍റെ ഭാഗമായി കാമ്പയിന്​ തുടക്കമിട്ടിരുന്നു. ഗാമോസ എന്ന അസാമീസ് പരമ്പരാഗത തുണിയിൽ ഒപ്പിട്ട്​ അയക്കാൻ രാഹുൽ ആളുകളോട് ആവശ്യപ്പെട്ടു. ഇതിന്​ വടക്കൻ അസമിലെ ആളുകളിൽനിന്നാണ് ഏറ്റവും കൂടുതൽ പിന്തുണ ലഭിച്ചത്​.

അതേസമയം, ഫെബ്രുവരിയിൽ മാത്രം മൂന്നുതവണയാണ്​ ​പ്രധാനമന്ത്രി ന​േ​രന്ദ്ര മോദി അസമിലെത്തിയത്​. രണ്ട് മെഡിക്കൽ കോളജുകളുടെയും രണ്ട് എൻജിനീയറിങ്​ കോളജുകളുടെയും ശിലാസ്ഥാപനം അദ്ദേഹം നിർവഹിച്ചു. 1.6 ലക്ഷത്തിലധികം തദ്ദേശവാസികൾക്ക് ഭൂമി വിതരണം ചെയ്യുകയും ചെയ്​തു.