അസമിൽ കോൺഗ്രസ്​ എം.എൽ.എ രാജിവെച്ചു; ഇന്ന്​ ബി.ജെ.പിയിൽ ചേരും

ഗുവാഹത്തി: അസമിൽ കോൺഗ്രസിന്​ വീണ്ടും തിരിച്ചടി. തേയില തോട്ടം തൊഴിലാളി വിഭാഗത്തിൽ നിന്നുള്ള നേതാവുമായിരുന്ന രുപ്​ജ്യോതി കുർമി ജൂണിക്ക്​ പിന്നാലെ ഉത്തര അസമിൽ നിന്നുള്ള യുവ നേതാവും എം.എൽ.എയുമായ സുശാന്ത ബോർഗോഹെയ്​ൻ പാർട്ടിയുടെ പ്രാഥമിക അംഗത്വത്തിൽ നിന്ന്​ രാജിവെച്ചു. പാർട്ടിയുടെ നിലവിലെ സാഹചര്യങ്ങളെ കുറ്റപ്പെടുത്തിയ അദ്ദേഹം ഇന്ന്​ ബി.ജെ.പിയിൽ ചേരും. തോവ്​രയിൽ നിന്നുള്ള എം.എൽ.എയാണ്​ സുശാന്ത.

എം.എൽ.എ സ്​ഥാനം രാജിവെച്ച സുശാന്തയുടെ രാജിക്കത്ത്​ സ്​പീക്കർ സ്വീകരിച്ചു. അസമിൽ ഹിമന്ത ബിശ്വ ശർമയുടെ നേതൃത്വത്തിലുള്ള ബി.ജെ.പി സർക്കാർ അധികാരത്തിലേറിയതിന്​ പിന്നാലെ രണ്ടാമത്തെ എം.എൽ.എയാണ്​ കോൺ​ഗ്രസിൽ നിന്ന്​ രാജിവെക്കുന്നത്​. നേരത്തെ ദീർഘകാലം കോൺഗ്രസ്​ നിയമസഭ സാമാജികനും തേയില തോട്ടം തൊഴിലാളി വിഭാഗത്തിൽ നിന്നുള്ള നേതാവുമായിരുന്ന രുപ്​ജ്യോതി കുർമി ജൂണിൽ പാർട്ടി വിട്ട്​ ബി.ജെ.പിയിലേക്ക്​ ചേക്കേറിയിരുന്നു.

അടുത്തിടെ നടന്ന തെരഞ്ഞെടുപ്പിൽ ബി.ജെ.പിയുടെ കുശാൽ ദോവാരിയെ 2049 വോട്ടിനാണ്​ സുശാന്ത തോൽപിച്ചത്​. 126 അംഗ അസം നിയമസഭയിൽ കോൺഗ്രസ്​ 29 സീറ്റുകൾ വിജയിച്ചിരുന്നു. എന്നാൽ സുശാന്ത കുടി രാജിവെച്ചതോടെ അംഗ സംഖ്യ 27 ആയി ചുരുങ്ങി.