പൗരത്വം നിയമം അസമിനെ രണ്ടാക്കി -ഗൗരവ്​ ഗോഗോയ്​

ഗുവാഹതി: പൗരത്വനിയമ ഭേദഗതി (സി.എ.എ.) വന്നതോടെ, അസം ജനത വിഭജിക്കപ്പെട്ടതായി അസമിലെ കോൺഗ്രസ്​ യുവനേതാവ്​ ഗൗരവ്​ ഗൊഗോയ് എം.പി​. പൗരത്വനിയമത്തിനു മുമ്പുള്ളവര​ും ശേഷമുള്ളവരും എന്ന തരത്തിലേക്കാണ്​ അത്​ മാറിയത്​. സാമൂഹിക രാഷ്​ട്രീയ മേഖലകളിലെല്ലാം അതി​‍െൻറ സ്വാധീനം കാണാം. വോട്ടിനുവേണ്ടി ജനങ്ങളെ ഭിന്നിപ്പിക്കാൻ ബി.ജെ.പി ആവിഷ്​കരിച്ച രാഷ്​ട്രീയ ആയുധമാണ്​ സി.എ.എ എന്നും വാർത്ത ഏജൻസിയായ പി.ടി.​െഎക്ക്​​ നൽകിയ അഭിമുഖത്തിൽ ഗൗരവ്​ ഗോഗോയ്​ പറഞ്ഞു.

അസമിൽ അധികാരം ലഭിച്ചാൽ പൗരത്വനിയമം നടപ്പാക്കുന്നത്​ ചെറുക്കും. വിവാദ നിയമത്തിനെതിരെ സുപ്രീംകോടതിയിലുള്ള കേസുകളിൽ അസം സർക്കാർ കക്ഷിചേരുമെന്നും മുൻ മുഖ്യമന്ത്രി തരുൺ ഗൊഗോയിയുടെ മകനായ ഗൗരവ്​ പറഞ്ഞു. സംസ്​ഥാന വികസനവും പൗരത്വവിഷയവും തെരഞ്ഞെടുപ്പിൽ ചർച്ചയാകും. 1971നു​ശേഷം രാജ്യത്തെത്തി അസമിൽ തങ്ങുന്ന വിദേശികളെ മതമേതെന്ന്​ നോക്കാതെ നാടുകടത്തണമെന്നാണ്​ അസം ധാരണയിലുള്ളത്​. മതത്തി​‍െൻറ പേരിലല്ല, സി.എ.എയെ എതിർക്കുന്ന പാർട്ടിയെന്ന നിലയിലാണ്​ ഓൾ ഇന്ത്യ യുനൈറ്റഡ്​ ഡമോക്രാറ്റിക്​ ഫ്രണ്ടുമായി​ സഖ്യമുണ്ടാക്കിയത്​. സമാന ചിന്താഗതിക്കാരാണ്​ സഖ്യകക്ഷികൾ എല്ലാം.

ബോഡോലാൻഡ്​​ പീപ്പിൾസ്​ ​ഫ്രണ്ട്​ (ബി.പി.എഫ്​),സി.പി.എം, സി.പി.​െഎ, സി.പി.ഐ (എം.എൽ), ആഞ്ചലിക്​ ഗണമോർച്ച എന്നിവരാണ്​ മറ്റു​ സഖ്യകക്ഷികൾ. മഹാസഖ്യം എന്നത്​ പുതിയ ആശയമല്ല. അന്തരിച്ച ത​‍െൻറ പിതാവാണ്​ എ.യു.ഡി.എഫ്​ ഉൾപ്പെടെ സമാനചിന്താഗതിക്കാരുമായി സഖ്യം വേണമെന്ന്​ ആദ്യമായി നിർദേശിച്ചത്​. ബി.ജെ.പി സർക്കാരിനെ തൂത്തെറിയാനാണ്​ സഖ്യം. ഇതിനെ അനുകൂലിക്കുന്നവരാണ്​ അസം ജനതയെന്ന്​ വൈകാതെ തെളിയുമെന്നും അദ്ദേഹം പറഞ്ഞു.

തൊഴിലില്ലായ്​മയാണ്​ സംസ്​ഥാനത്തെ നീറുന്ന പ്രശ്​നം. സി.എ.എ റദ്ദാക്കൽ, അഞ്ചു ലക്ഷം സർക്കാർ ജോലി, തേയില തൊഴിലാളികൾക്ക്​ 365 ​രൂപ ദിവസവേതനം, 200 യൂനിറ്റ്​ സൗജന്യ വൈദ്യുതി, 2000 രൂപയുടെ പ്രതിമാസ സഹായം എന്നിങ്ങനെ കോൺഗ്രസി​‍െൻറ അഞ്ചിന വാഗ്​ദാനം ജനം സ്വീകരിക്കും -ഗൗരവ്​ പറഞ്ഞു.

മാർച്ച്​ 27, ഏപ്രിൽ ഒന്ന്​, ആറ്​ തീയതികളിൽ മൂന്ന്​ ഘട്ടങ്ങളിലായാണ്​ 126 അംഗ അസം നിയമസഭയിലേക്ക്​ വോ​ട്ടെടുപ്പ്​.