മധ്യപ്രദേശ്​ മുഖ്യമന്ത്രി ശിവ്​രാജ്​ സിങ്ങിനെ കൊതുക്​ കടിച്ചു; എഞ്ചിനിയർക്ക്​ 'പണികിട്ടി'

ഭോപാൽ: മധ്യപ്രദേശിൽ ബി.ജെ.പി മന്ത്രിസഭയുടെ അമരക്കാരനായ ശിവരാജ്​ സിങ്​ ചൗഹാന്​ ഗസ്റ്റ്​ ഹൗസിൽനിന്ന്​ കൊതുകുകടിയേറ്റതിന്​ പണി കിട്ടിയത്​ എഞ്ചിനിയർക്ക്​. ബസ്​ ദുരന്തത്തിൽ മരിച്ചവരെ കാണാൻ സിദ്ധി പട്ടണത്തിൽ എത്തിയ ചൗഹാൻ രാ​ത്രി ഗസ്റ്റ്​ ഹൗസിൽ തങ്ങിയപ്പോഴാണ്​ വില്ലനായി കൊതുക്​ എത്തിയത്​. കടിയേറ്റ്​ ഉറക്കം നഷ്​ടപ്പെട്ട മുഖ്യമന്ത്രി അരിശപ്പെട്ട്​ ബന്ധപ്പെട്ടവരെ വിളിച്ചുവരുത്തി കാരണം തേടുകയായിരുന്നു.

ചൗഹാൻ അന്തിയുറങ്ങുന്ന മുറിയിൽ കൊതുക്​ എത്തുന്നത്​ തടയാൻ നടപടി എടുക്കാത്തതിന്​ പി.ഡബ്ല്യു.ഡി എക്​സിക്യുട്ടീവ്​ എഞ്ചിനിയർക്കാണ്​​ ​റിവ ഡിവിഷനൽ കമീഷണർ രാജേഷ്​കുമാർ ജെയ്​ൻ കാരണം കാണിക്കൽ നോട്ടീസ്​ നൽകിയത്​.

എഞ്ചിനിയറെ സസ്​പെൻഡ്​ ചെയ്​തതായി വാർത്തയുണ്ടായിരുന്നുവെങ്കിലും അത്​

ഡിവിഷനൽ കമീഷണർ നിഷേധിച്ചിട്ടുണ്ട്​. നടപടി സ്വീകരിച്ച്​ അയച്ച കത്ത്​ നേര​ത്തെ സമൂഹ മാധ്യമങ്ങളിൽ ​പ്രചരിച്ചിരുന്നു.

ബംഗാംഗ കനാലിൽ ബസ്​ വീണ്​ നിരവധി പേർ മരിച്ച സംഭവത്തിൽ ബുധനാഴ്ചയാണ്​ മുഖ്യമന്ത്രി സന്ദർശനത്തിനെത്തിയത്​. വീടുകളിൽ സന്ദർശനം പൂർത്തിയാക്കിയ ശേഷമാണ്​ ഗസ്റ്റ്​ ഹൗസിന്‍റെ ഒന്നാം നമ്പർ മുറിയിൽ തങ്ങുന്നത്​.

മുഖ്യമന്ത്രി രാത്രി തങ്ങുന്ന വിവരം അറിയാത്തതു കൊണ്ടാണ്​ ആവശ്യമായ നടപടികൾ സ്വീകരിക്കാൻ കഴിയാതെ പോയതെന്നാണ്​ ഉദ്യോഗസ്​ഥ വിശദീകരണം.