കടുത്ത പനിയും ചുമയും കൺപോളയിൽ വീക്കവും ചൊറിച്ചിലും; പുതിയ കോവിഡ് വകഭേദത്തിന്റെ ഇരകൾ കുട്ടികളെന്ന് മുന്നറിയിപ്പ്

ന്യൂഡൽഹി: ഇന്ത്യയിൽ കോവിഡ് നിരക്ക് കുതിച്ചുയരുകയാണ്. 24 മണിക്കൂറിനിടെ 6050 പേർക്കാണ് കഴിഞ്ഞ ദിവസം കോവിഡ് സ്ഥിരീകരിച്ചത്. ഇതോടെ സജീവ ​കോവിഡ് രോഗികളുടെ എണ്ണം 28,303 ആയി. കോവിഡിന്റെ പുതിയ വകഭേദം കൂടുതലായി ബാധിക്കുന്നത് കുട്ടികളെയാണെന്ന ആരോഗ്യ വിദഗ്ധർ മുന്നറിയിപ്പു നൽകുന്നു. XBB.1.16 വകഭേദമാണ് ഇപ്പോൾ പടരുന്നത്.

ആദ്യ തരംഗങ്ങളിൽ പ്രകടമാകാത്ത ലക്ഷണങ്ങളാണ് ഈ വകഭേദം ബാധിച്ചവർ കാണിക്കുന്നത്. കടുത്ത പനി, ചുമ, ജലദോഷം, കൺപോളകളിൽ വീക്കവും ചൊറിച്ചിലും എന്നിവയാണ് പ്രധാനലക്ഷണങ്ങൾ. കൺപോളകളിൽ വീക്കവും ചൊറിച്ചിലും മുൻ തരംഗങ്ങളിൽ കണ്ടിരുന്നില്ല.

പുതിയ വക​ഭേദത്തിന് അധികവ്യാപന ശേഷിയുണ്ടെന്നും ഡോക്ടർമാർ പറയുന്നു. വ്യാപനത്തിനൊപ്പം രൂക്ഷതയും കൂടുതലാണ്. വൈറസിന് മാറ്റം സംഭവിക്കുന്നതു മൂലമാണിത്. കോവിഡ് വർധിക്കുന്നതിനെ തുടർന്ന് രാജ്യത്തുടനീളം ഏപ്രിൽ 10ന് കോവിഡ് മോക്ഡ്രിൽ സംഘടിപ്പിക്കാനും തീരുമാനമുണ്ട്.