ആര്യൻ ഖാൻ ജുഡീഷ്യൽ കസ്റ്റഡിയിൽ; എൻ.സി.ബിയുടെ കസ്റ്റഡി ആവശ്യം തള്ളി

മുംബൈ: മയക്കുമരുന്ന്​ കേസിൽ അറസ്റ്റിലായ ഷാരൂഖ്​ ഖാന്‍റെ മകൻ ആര്യൻ ഖാൻ ജുഡീഷ്യൽ കസ്റ്റഡിയിൽ. ആര്യൻ ഖാനൊപ്പം മറ്റ്​ ഏഴ്​ പ്രതികളേയും ജുഡീഷ്യൽ കസ്റ്റഡിയിൽ വിട്ടു. 14 ദിവസത്തെ ജുഡീഷ്യൽ കസ്റ്റഡിയിലാണ്​ പ്രതികളെ വിട്ടത്​.

ആര്യൻ ഖാന്‍റെ അഭിഭാഷകൻ കോടതിയിൽ ഇതുമായി ബന്ധപ്പെട്ട്​ ഇടക്കാല ജാമ്യാപേക്ഷ സമർപ്പിച്ചിട്ടുണ്ട്​. ജാമ്യാപേക്ഷയിൽ നാളെ തീരുമാനമുണ്ടാവും. ആര്യൻഖാനേയും മറ്റ്​ പ്രതികളേയും ഒക്​ടോബർ 11 വരെ കസ്റ്റഡിയിൽ വേണമെന്നായിരുന്നു എൻ.സി.ബി ആവശ്യം. എന്നാൽ, ആര്യൻ ഖാന്​ മയക്കുമരുന്ന്​ നൽകിയെന്ന്​ സംശയിക്കുന്നു അർച്ചിറ്റ്​ കുമാറിനെ മാത്രം ഒക്​ടോബർ ഒമ്പത്​ വരെ കസ്റ്റഡിയിൽ വിട്ട കോടതി മറ്റുള്ളവരെ ജുഡീഷ്യൽ കസ്റ്റഡിയിലേക്ക്​ മാറ്റി. അതേസമയം ഇനി എൻ.സി.ബി കസ്റ്റഡി ആവശ്യമില്ലെന്ന്​ ആര്യൻ ഖാന്‍റെ അഭിഭാഷകനും വാദിച്ചിരുന്നു.

ഒക്​ടോബർ മൂന്നിനാണ്​ ആഡംബര കപ്പലിൽ നിന്ന്​ ആര്യൻ ഖാനെ എൻ.സി.ബി സംഘം അറസ്റ്റ്​ ചെയ്​തത്​. മയക്കുമരുന്ന്​ പാർട്ടിക്കിടയിലായിരുന്നു എൻ.സി.ബി സംഘത്തിന്‍റെ അറസ്റ്റ്​. തുടർന്ന്​ ചോദ്യം ചെയ്യലിനൊടുവിൽ ആര്യൻ ഖാനെ മയക്കുമരുന്ന്​ കേസിൽ പ്രതിയാക്കുകയായിരുന്നു.