പാസ്പോർട്ട് ചോദിച്ച് ആര്യൻ ഖാൻ കോടതിയിൽ

മുംബൈ: മയക്കുമരുന്ന് കേസിലെ ജാമ്യവ്യവസ്ഥയുടെ ഭാഗമായി പിടിച്ചുവെച്ച പാസ്പോർട്ട് തിരികെചോദിച്ച് നടൻ ഷാറൂഖ് ഖാന്റെ മകൻ ആര്യൻഖാൻ കോടതിയിൽ. ആഡംബര കപ്പലിലെ മയക്കുമരുന്ന് വേട്ടക്കിടെ അറസ്റ്റിലായ ആര്യനടക്കം ആറുപേർക്ക് നാർകോട്ടിക് കൺട്രോൾ ബ്യൂറോയുടെ (എൻ.സി.ബി) പ്രത്യേക അന്വേഷണസംഘം പിന്നീട് ക്ലീൻ ചിറ്റ് നൽകിയിരുന്നു. ഇത് ചൂണ്ടിക്കാട്ടിയാണ് പാസ്പോർട്ടിനായി മയക്കുമരുന്ന് കേസുകൾ കൈകാര്യം ചെയ്യുന്ന എൻ.ഡി.പി.എസ് കോടതിയിൽ ആര്യൻ ഹരജി നൽകിയത്. കോടതി ഹരജി 11ന് പരിഗണിക്കും.