അയോധ്യയിലെ ശ്രീരാമവിഗ്രഹം കർണാടകയിൽ നിന്ന്...

ന്യൂഡൽഹി: അയോധ്യയിലെ രാമക്ഷേത്രത്തിനായി മൈസൂരിലെ അരുൺ യോഗിരാജ് നിർമിച്ച 'രാംലല്ല വിഗ്രഹം' തിരഞ്ഞെടുത്തതായി ക്ഷേത്ര ട്രസ്റ്റ് ജനറൽ സെക്രട്ടറി ചമ്പത് റായ് അറിയിച്ചു. അരുൺ യോഗിരാജ് കൊത്തിയെടുത്ത രാമ വിഗ്രഹം അയോധ്യയിലെ രാമ ക്ഷേത്രത്തിൽ മുഖ്യവിഗ്രഹമായാണ് പ്രതിഷ്ഠിക്കുന്നത്. ജനുവരി 22 നാണ് പ്രതിഷ്ഠാ ദിനം.

ശ്രീരാമ വിഗ്രഹം കൊത്തിയെടുക്കാൻ ശ്രീരാമ ജന്മഭൂമി തീർത്ഥക്ഷേത്രം തിരഞ്ഞെടുത്ത മൂന്ന് ശിൽപികളിൽ അരുൺ യോഗിരാജും ഉൾപ്പെട്ടിരുന്നു. മൂന്ന് വിഗ്രഹങ്ങളിൽ നിന്നാണ് അരുണിന്‍റെ 'രാംലല്ല വിഗ്രഹം' തിരഞ്ഞെടുത്തതെന്ന് അയോധ്യയിൽ വാർത്താസമ്മേളനത്തിൽ സംസാരിക്കവെ റായ് പറഞ്ഞു. കേദാർനാഥിലെ ആദിശങ്കരാചാര്യരുടെയും ഡൽഹിയിലെ ഇന്ത്യാ ഗേറ്റിൽ നേതാജി സുഭാഷ് ചന്ദ്രബോസിന്‍റെയും പ്രതിമകൾ നിർമിച്ചതും അരുൺ തന്നെയാണെന്ന് രാമ ക്ഷേത്ര ട്രസ്റ്റ് വ്യക്തമാക്കി.

ഏകദേശം 150-200 കിലോഗ്രാം വരെ ഭാരമുള്ള പുതിയ വിഗ്രഹം കല്ലിൽ നിർമിച്ചതാണ്. കഴിഞ്ഞ 70 വർഷമായി ആരാധിക്കുന്ന രാംലല്ലയുടെ ഇപ്പോഴത്തെ വിഗ്രഹവും പുതിയ ക്ഷേത്രത്തിന്റെ ശ്രീകോവിലിൽ സൂക്ഷിക്കുമെന്ന് റായ് പറഞ്ഞു. പ്രധാനമന്ത്രി നരേന്ദ്ര മോദിയുടെ സാന്നിധ്യത്തിൽ ജനുവരി 22 ന് അയോധ്യയിലെ രാമക്ഷേത്രത്തിന്റെ പ്രതിഷ്ഠാ ചടങ്ങ് സംഘടിപ്പിക്കും.

രാംലല്ലയുടെ പ്രതിഷ്ഠാ ചടങ്ങിനുള്ള ഔപചാരിക നടപടിക്രമങ്ങൾ ഇന്ന് ആരംഭിക്കും. ഏഴ് ദിവസത്തെ പരിപാടികളാണ് നടത്താൻ ഉദ്ദേശിക്കുന്നത്. മഹത്തായ ചടങ്ങിലേക്ക് ഏഴായിരത്തിലധികം ആളുകളെ ക്ഷേത്ര ട്രസ്റ്റ് ക്ഷണിച്ചിട്ടുണ്ട്. 150 രാജ്യങ്ങളിൽ നിന്നുള്ള ഭക്തർ സമാപന ദിവസം നടക്കുന്ന മെത്രാഭിഷേക ചടങ്ങിൽ പങ്കെടുക്കാൻ സാധ്യതയുണ്ടെന്നാണ് അനുമാനം.