നീതിന്യായ വ്യവസ്​ഥയിൽ വിശ്വാസമെന്ന്​ സഫൂറ സർഗാറി​െൻറ ഭർത്താവ്​

ന്യൂഡൽഹി: ജാമിഅയിലെ വിദ്യാര്‍ഥി നേതാവും കോര്‍ഡിനേഷന്‍ കമ്മിറ്റിയുടെ മീഡിയ കോര്‍ഡിനേറ്ററുമായിരുന്ന സഫൂറ സർഗാറിനെതിരെ സാമൂഹിക മാധ്യമങ്ങൾ വഴി നടക്കുന്ന അപവാദപ്രചാരണങ്ങളിൽ മനംനൊന്ത്​ കുടുംബം. അതിനിടയിലും രാജ്യത്തെ നീതിന്യായ സംവിധാനത്തിൽ പൂർണ വിശ്വാസമർപ്പിക്കുകയാണ്​ സഫൂറയുടെ ഭർത്താവ്​. 

ജാമിഅയിലെ എം.ഫിൽ വിദ്യാർഥിയും മൂന്നുമാസം ഗർഭിണിയുമായ സഫൂറയെ ഡൽഹി വംശഹത്യയിൽ പങ്കുണ്ടെന്നാരോപിച്ചാണ്​ ഇക്കഴിഞ്ഞ ഏപ്രിൽ 10ന്​ പൊലീസ്​ അറസ്​റ്റ്​ ചെയ്​തത്​.​ ജാമ്യം നിഷേധിക്കുകയും ചെയ്​തു. ഏപ്രിൽ 21ന്​ സഫൂറ​െക്കതിരെ യു.എ.പി.എ ചുമത്തി. ഇപ്പോൾ കനത്ത സുരക്ഷയിൽ തിഹാർ ജയിലിൽ കഴിയുകയാണ്​. 

തിങ്കളാഴ്​ചയാണ്​ സഫൂറ സർഗാർ എന്ന ഹാഷ്​ടാഗിൽ ട്വിറ്ററിൽ അവർക്കെതിരെ പ്രചാരണം നടക്കുന്നത്​ കുടുംബാംഗങ്ങളുടെ ശ്രദ്ധയിൽ പെട്ടത്​. ഡൽഹി കലാപത്തിന്​ ആഹ്വാനം നൽകിയയാളെന്ന ആരോപണത്തി​​​െൻറ​ നിഴലിലുള്ള ബി.ജെ.പി നേതാവ്​ കപിൽ മിശ്ര സഫൂറയുടെ ഗർഭത്തെ പരിഹസിച്ച്​ ട്വിറ്ററിൽ പ്രസ്​താവന നടത്തി. ‘‘റമദാൻ കാലത്ത്​ ഗർഭിണിയായ ആക്​ടിവിസ്​റ്റ്​ സഫൂറ സർദാർ ജയിലിൽ കഴിയുന്നു. കലാപത്തിന്​ നേതൃത്വം നൽകിയ കപിൽ മിശ്രയെ പോലുള്ള വർഗീയവാദികൾ സ്വതന്ത്രമായി വിഹരിക്കുന്നു’’- എന്നായിരുന്നു കോൺഗ്രസുകാരനായ സൽമാൻ നിസാമി ട്വിറ്ററിൽ കുറിച്ചത്​. അതിനു മറുപടിയായി ദയവായി എ​​​െൻറ പ്രസംഗത്തെ അവരുടെ ഗർഭവുമായി താരതമ്യപ്പെടുത്തരുതെന്ന്​ മിശ്ര ട്വീറ്റ് ചെയ്​തു​. 

പിന്നാലെ സഫൂറയുടെ വിവാഹജീവിതത്തെയും ഗർഭത്തെയും അപഹസിച്ച്​ നിരവധി പേർ ട്വീറ്റ്​ ചെയ്​തു. സഫൂറയുടെ ചിത്രത്തിനു താഴെ അപഹാസ്യമായി ട്വീറ്റ്​ ചെയ്​തവരുടെ എണ്ണം ഭയപ്പെടുത്തുന്നുവെന്നും ഇത്​ സ്വഭാവഹത്യയാണെന്നും​ അവരുടെ സഹോദരി സമീയ സർഗാർ മാധ്യമങ്ങളോട്​ പറഞ്ഞു. ഇത്തരം ട്രോളുകൾക്ക്​ മറുപടി നൽകി അതിനെ മഹത്വവത്​കരിക്കാനില്ലെന്നും അവർക്കു ചെയ്യാൻ കഴിയുന്നത്​ ചെയ്യ​ട്ടെയെന്നും​ സഫൂറയുടെ ഭർത്താവ്​ പ്രതികരിച്ചു. അവൾക്ക്​ ജാമ്യം കിട്ടുമെന്ന പ്രതീക്ഷയിലായിരുന്നു ഞങ്ങൾ. എന്നാൽ, ലോക്​ഡൗൺ നീട്ടിയതു മൂലം എല്ലാം മന്ദഗതിയിലാണ്​ നടക്കുന്നത്​. ഇന്ത്യയിലെ നീതിന്യായ സംവിധാനത്തിൽ വിശ്വാസമർപ്പിച്ചു കഴിയുകയാണ്​ ഞങ്ങൾ -അദ്ദേഹം കൂട്ടിച്ചേർത്തു. 

സഫൂറയെ ജയിലിൽ പാർപ്പിച്ചതിനെതിരെ ലോകവ്യാപകമായി പ്രതിഷേധമുയരുകയാണ്​. ആംനസ്​റ്റി ഇൻറർനാഷനൽ അടക്കം ഇതിനെതിരെ രംഗത്തുവന്നിട്ടുണ്ട്​. പൗരത്വ ഭേദഗതി നിയമത്തിനെതിരെ ഡിസംബറിലും ജനുവരിയിലും ജാമിഅയിൽ നടന്ന വിദ്യാർഥി പ്രതിഷേധത്തി​​​െൻറ ഭാഗമായിരുന്നു സഫൂറ. ഫെബ്രുവരിയിൽ ജഫറാബാദ്​ മെട്രോസ്​റ്റേഷനിൽ പ്രതിഷേധം സംഘടിപ്പിച്ചതിന്​ അറസ്​റ്റ്​ വരിച്ചിരുന്നു.