കശ്മീരിൽ ഭീകരരുമായുള്ള ഏറ്റുമുട്ടലിൽ മേജറും ജവാനും കൊല്ലപ്പെട്ടു

ശ്രീനഗർ: ജമ്മു-കശ്​മീരിൽ ഏറ്റുമുട്ടലിൽ മേജർ ഉൾപ്പെടെ രണ്ടുസൈനികരും രണ്ടു തീവ്രവാദികളും കൊല്ലപ്പെട്ടു. ഷോപിയാൻ ജില്ലയിലെ സൈനപുരയിൽ തീവ്രവാദികൾ പതിയിരുന്ന്​ നടത്തിയ ആക്രമണത്തിലാണ്​ സൈനികർക്ക്​ ജീവഹാനിയുണ്ടായത്​. കുൽഗാം ജില്ലയിലെ ഗോപാൽപുരയിലാണ്​ അഞ്ച്​ പൊലീസുകാരെ കൊന്നത്​ ഉൾപ്പെടെ നിരവധി ആക്രമണ​ക്കേസുകളിൽ പ്രതികളായ ഹിസ്​ബുൽ മുജാഹിദീൻ ഭീകരർ കൊല്ലപ്പെട്ടതെന്ന്​്​ പൊലീസ്​ പറഞ്ഞു.

തീവ്രവാദികൾ ഒളിച്ചിരിക്കുന്നുവെന്ന വിവരത്തെതുടർന്ന്​ സൈനപുരയിൽ വീടുകൾതോറും പരിശോധന നടത്തുന്നതിനിടെയുണ്ടായ ആക്രമണത്തിൽ മേജർ കമലേഷ്​ പാണ്ഡെ, സിപായി തൻസീൻ ചുൽതിം എന്നിവരാണ്​ മരിച്ചത്​. ഗുരുതര പരിക്കുകളോടെ 92 ബേസ്​ സൈനികആശുപത്രിയിൽ എത്തിച്ച ഇവരുടെ ജീവൻ രക്ഷിക്കാൻ സാധിച്ചില്ല. സംഭവത്തിൽ സിപായി കൃപാൽ സിങ്ങിന്​ പരിക്കേറ്റു. ആക്രമണം നടത്തിയവർ രക്ഷപ്പെട്ടു.  

​ഇൗ വർഷം മേയിൽ ബാങ്കിലേക്ക്​ പണവുമായി പോയ വാൻ ആക്രമിച്ചത്​ ഉൾപ്പെടെയുള്ള കേസുകളിൽ പ്രതികളായ ആഖിബ്​  ഹുസൈൻ ഇത്തു, സുഹൈൽ അഹ്​മദ്​ റാത്തർ എന്നിവരാണ്​ ഗോപാൽപുരയിൽ സൈന്യവുമായുണ്ടായ ഏറ്റുമുട്ടലിൽ കൊല്ല​പ്പെട്ടത്​. മേയ്​ ഒന്നിലെ സംഭവത്തിൽ അഞ്ച്​ പൊലീസുകാരും രണ്ടു ബാങ്ക്​ ജീവനക്കാരും മരിച്ചിരുന്നു. ഇതിനുപുറമെ, കുൽഗാമിലെ യാറിപുരയിൽ പൊലീസ്​ കോൺസ്​റ്റ​ബിളിനെ വധിച്ച സംഭവത്തിലും ആഖിബ്​ ഹുസൈൻ പ്രതിയാണ്​. 

മേജർ കമലേഷ്​ പാണ്ഡെ ഉത്തരാഖണ്ഡിലെ അൽമോറ സ്വദേശിയാണ്​. 2012 ജൂണിലാണ്​ സൈന്യത്തിൽ ചേർന്നത്​. ഹിമാചൽ പ്രദേശുകാരനായ തൻസീൻ ചുൽതിം 2012 സെപ്​റ്റംബർ മുതൽ സൈന്യത്തിൽ സേവനമനുഷ്​ഠിക്കുകയായിരുന്നു.