കശ്​മീരിൽ വ്യാജ ഏറ്റുമുട്ടലിലൂടെ മൂന്ന്​ യുവാക്കളെ കൊലപ്പെടുത്തിയ കേസ്​: സൈനിക ക്യാപ്​റ്റനെതിരെ കുറ്റപത്രം

ശ്രീനഗർ: ദക്ഷിണ കശ്​മീരിലെ ഷോപിയാനിൽ വ്യാജ ഏറ്റുമുട്ടലിലൂടെ മൂന്ന്​​ യുവാക്കളെ കൊലപ്പെടുത്തിയ കേസിൽ സൈനിക ക്യാപ്​റ്റൻ ഉൾപ്പെടെ മൂന്നുപേർക്കെതിരെ ജമ്മു-കശ്​മീർ പൊലീസ്​ കുറ്റപത്രം സമർപ്പിച്ചു. സായുധസേനയുടെ 62 രാഷ്​ട്രീയ റൈഫിൾസിലെ ക്യാപ്​റ്റൻ ഭൂഭേന്ദ്ര സിങ്​, സിവിലിയന്മാരായ തബിഷ്​ നാസിർ, ബിലാൽ അഹ്​മദ്​ എന്നിവരാണ്​ കേസിലെ പ്രതികൾ. ശനിയാഴ്​ച ഷോപിയാൻ ജില്ല സെഷൻ കോടതിയിലാണ്​ 300 പേജ്​ അടങ്ങുന്ന കുറ്റപത്രം ജമ്മു-കശ്​മീർ പ്രത്യേക അന്വേഷണ സംഘം സമർപ്പിച്ചത്​.

കേസിൽ തബിഷ്​ നാസിർ, ബിലാൽ അഹ്​മദ്​ എന്നിവർ ജുഡീഷ്യൽ കസ്​റ്റഡിയിലാണെന്നും എന്നാൽ, ക്യാപ്​റ്റൻ ഭൂഭേന്ദ്ര സിങ്ങിനെ അഫ്​സ്​പ (സായുധ സേനയുടെ പ്രത്യേക അധികാര നിയമം) നിയമ സംരക്ഷണമുള്ളതിനാൽ ഇതുവരെ അറസ്​റ്റ്​ ചെയ്​തിട്ടില്ലെന്നും കുറ്റപത്രത്തിൽ പൊലീസ്​ വ്യക്​തമാക്കി.

യുവാക്കളെ അവരുടെ താമസസ്​ഥലത്തുനിന്നും തട്ടിക്കൊണ്ടുപോകാൻ ഉപയോഗിച്ച സൈനിക വാഹനവും ഇവരെ അജ്ഞാത കേന്ദ്രത്തിലേക്ക്​ മാറ്റാൻ ഉപയോഗിച്ച വാഹനവും ​​പൊലീസ്​ പിന്നീട്​ കണ്ടെത്തിയതായി കുറ്റപത്രത്തിലുണ്ട്​. പ്രതികൾ ഉപയോഗിച്ച ആയുധങ്ങൾ കണ്ടെത്തി ചണ്ഡിഗഢിലെ സി.എഫ്​.എസ്​.എല്ലിന്​ കൈമാറിയിട്ടുണ്ട്​. കൊലപാതകം, തട്ടിക്കൊണ്ടുപോകൽ, തെളിവ്​ നശിപ്പിക്കൽ, കുറ്റകരമായ ഗൂഢാലോചന, അന്യായമായി നിരോധിത ആയുധങ്ങൾ കൈവശം വെക്കൽ എന്നിവക്കെതിരായ വകുപ്പുകൾ പ്രകാരമാണ്​ കേസെടുത്തിട്ടുള്ളത്​.

ഷോപിയാൻ ജില്ലയിലെ അമിഷ​്​പോരയിൽ കഴിഞ്ഞ ജൂലൈ 18നാണ്​ രജൗരി ജില്ലയിൽനിന്നുള്ള അബ്​റാർ, ഇംതിയാസ്​, അബ്​റാർ അഹ്​മദ്​ എന്നിവരെ ക്യാപ്​റ്റൻ ഭൂഭേന്ദ്ര സിങ്ങി​െൻറ നേതൃത്വത്തിലുള്ള സംഘം തട്ടിക്കൊണ്ടുപോയി കൊലപ്പെടുത്തിയത്​. ഇവരിൽനിന്ന്​ വൻതോതിലുള്ള ആയുധം കണ്ടെത്തിയെന്നും സൈന്യം അവകാശപ്പെട്ടിരുന്നു.

എന്നാൽ, സംഭവം വ്യാജ ഏറ്റുമുട്ടലാണെന്ന്​ ആരോപണമുയർന്നതിനെ തുടർന്ന്​ സെപ്​റ്റംബറിൽ സൈനിക കോടതി അന്വേഷണത്തിന്​ ഉത്തരവിടുകയായിരുന്നു. ഈ അന്വേഷണത്തിലാണ്​ സംഭവം വ്യാജ ഏറ്റമുട്ടലാണെന്നും സായുധ സേനയുടെ പ്രത്യേക അധികാര നിയമം സൈനികൻ ലംഘിച്ചതായും പ്രഥമദൃഷ്​ട്യാ ക​ണ്ടെത്തിയത്​.