കന്നുകാലി കച്ചവടം​ 'ആപി'ലാക്കി ഇന്ത്യ; കച്ചവടം പൊടിപൊടിക്ക​ുമോ?

ന്യൂഡൽഹി: നൂറ്റാണ്ടുകളായി ഇന്ത്യൻ ഗ്രാമങ്ങ​ളുടെ മുഖഛായയായിരുന്ന കാലിച്ചന്തകൾ പതിയെ കച്ചവടം നിർത്തി ഓർമയിലേക്ക്​ മടങ്ങു​േമ്പാൾ പകരം ചുമതലയേറ്റെടുത്ത്​ മൊബൈൽ ആപുകൾ. 'ആനിമാൾ', 'പശുശാല', 'പശുലോക്​', പശുമാൾ', പശു​ മേള', പശു വ്യാപാർ' തുടങ്ങി പല പേരുകളിൽ ഓൺലൈൻ ലോകത്ത്​ ആപുകൾ പലതുണ്ട്​. ജനപ്രീതി പരിഗണിച്ചാൽ ഇവയിൽ ചിലത്​ ഏറെ മുന്നിലുണ്ടെന്നത്​ വേറെകാര്യം.

ഉദാഹരണത്തിന്​ ഹരിയാന, ഉത്തർപ്രദേശ്​, രാജസ്​ഥാൻ തുടങ്ങിയ സംസ്​ഥാനങ്ങളിൽ സജീവ സാന്നിധ്യമായി മാറിയ 'ആനിമാൾ' ഇതിനകം 40 ലക്ഷം പേർ മൊബൈൽ ഫോണുകളിൽ ഡൗൺലോഡ്​ ചെയ്​തിട്ടുണ്ട്​. 2019ൽ മാത്രമാണ്​ ഇതിന്‍റെ പിറവിയെന്നോർക്കണം. നീതു യാദവ്​ ഉൾപെടെ സംഘമാണ്​ പിന്നിൽ. തുടങ്ങിയ ആദ്യ 30 ദിവസം കൊണ്ട്​ ആപു വഴി വിൽപന നടത്താനായത്​ 50 കാലികളെ മാത്രം. പിന്നീട്​ സംഭവിച്ചതെല്ലാം ചരിത്രം. ഇന്നിപ്പോൾ അഞ്ചു ലക്ഷത്തിലെത്തിനിൽക്കുന്നു ആപു വഴി നടന്ന കന്നുകാലി വിൽപന. കോവിഡ്​ നിയന്ത്രണങ്ങളിൽ ഇളവു വന്ന 2021 ജനുവരിയിൽ മാത്രം അര ലക്ഷം കാലികളെ വിൽപന നടത്തിയതായി ​ഡൽഹി ഐ.ഐ.ടി ബിരുദധാരിയായ യാദവ്​ പറയുന്നു. അതിന്​ മുമ്പ്​ നവംബറിൽ 30,000ഉം ഡിസംബറിൽ 40,000 ഉവുമായിരുന്നു വിൽപന. ഹരിയാന, യു.പി, രാജസ്​ഥാൻ സംസ്​ഥാനങ്ങളിൽ മാ​ത്രമാണ്​ 'ആനിമാളി'ന്‍റെ സേവനം.

മറ്റൊരു കന്നുകാലി വിൽപന ആപായ 'പശുശാല'യിൽ 15,000 കോളുകൾ​ കോവിഡ്​ കാലത്ത്​ വന്നതായി സ്​ഥാപകരി​െലാരാളായ റാഞ്ചി ​െഎ.ഐ.എം മുൻ വിദ്യാർഥി ഗൗരവത്​ ചൗധരി പറയുന്നു. 2018ലാണ്​ 'പശുശാല' ആദ്യമായി തുടങ്ങിയത്​. പഞ്ചാബ്​, ഹരിയാന, രാജസ്​ഥാൻ, യു.പി, ബിഹാർ, മധ്യപ്രദേശ്​ സംസ്​ഥാനങ്ങളിൽ സേവനം ലഭ്യമാണ്​. ഇതുവരെ 1,000 കാലികളെ ആപുവഴി വിൽപന നടത്താനായിട്ടുണ്ട്​.

ഇന്ത്യയിൽ 54 കോടിയോളം വളർത്തുമൃഗങ്ങൾ ഉണ്ടെന്നാണ്​ 2019ലെ കണക്ക്​. ഇതിൽ 30 കോടി കന്നുകാലികളാണ്​​.

സ്വകാര്യ സ്​ഥാപനങ്ങളുടെ വിജയം കണക്കിലെടുത്ത്​ കേന്ദ്ര സർക്കാറും 'ഇ-പശുഹാത്​' എന്ന സ്വന്തം പോർട്ടൽ ഇതേ ആവശ്യവുമായി തുറന്നിട്ടുണ്ട്​. 2016ൽ തുടങ്ങിയ ആപ്​ പക്ഷേ, ഇപ്പോഴും വേണ്ടത്ര പ്രവർത്തനക്ഷമ​മല്ലെന്ന്​ പരാതിയുണ്ട്​.

കാറുകൾ വാങ്ങുംപോലെയാകുമോ ഓൺലൈനിൽ കാലി വാങ്ങൽ?

സാധാരണമായി കാലികളെ നേരിട്ടുചെന്ന്​ കണ്ട്​ പാൽ, ആരോഗ്യം, നിറം തുടങ്ങി വിവിധ കാര്യങ്ങൾ ഉറപ്പുവരുത്തിയാണ്​ മുമ്പുകാലത്ത്​ വാങ്ങിയിരുന്നത്​. ഓൺലൈനാകു​േമ്പാൾ പക്ഷേ, വിലയിട്ട ഒരു ചിത്രം മാത്രമാകും ഉണ്ടാകുക. അത്​ എത്ര കണ്ട്​ ഫലപ്രദമാകുമെന്നാണ്​ ചോദ്യം. ഇൗ വിഷയം എങ്ങനെ പരിഹരിക്കുമെന്ന്​ ഗൗരവതരമായ ആലോചനയിലാണെന്ന്​ 'ആനിമാൾ' സഹസ്​ഥാപകൻ യാദവ്​ പറയുന്നു.

വിവിധ ഇനം പശുക്കൾക്ക്​ ഓൺലൈനിൽ വിലയിലുമുണ്ട്​ വ്യത്യാസം​. അരലക്ഷം മുതൽ ഒരു ലക്ഷംവരെയാണ്​ ഗീർ പശുക്കൾക്ക്​ വില. ഓരോ ഇനത്തിനും വില കൂടുകയോ കുറയുകയോ ആകാം.

കാലിക്കടത്തിൽ പുതുതായി വന്ന മാറ്റങ്ങൾ കാലിച്ചന്തകളുടെ പൊലിമ ചോർത്തിയതാണ്​ ഓൺലൈനിലേക്ക്​ കാര്യങ്ങൾ എത്തിച്ചത്​. സർക്കാർ തലത്തിൽ നിയമങ്ങൾ കടുപ്പിക്കുകയും ഗോസംരക്ഷണമെന്ന പേരിൽ ഗുണ്ടകളുൾപെടെ സജീവമാകുകയും ചെയ്​തത്​ ചന്തകളെ പതിയെ ചിത്രത്തിനു പുറത്ത്​ നിർത്തിയതായി കണക്കുകൾ പറയുന്നു. രാജ്യത്തെ ഏറ്റവും പങ്കാളിത്തമുള്ള കാലിച്ചന്തകളിലൊന്നായ നാഗോർ ചന്ത തന്നെ ഉദാഹരണം. 2010-11 വർഷം 19,000 ഓളം കാലികൾ എത്തിയ ചന്തയിൽ 2019-20ൽ ഹാജരായത്​ 5,000 ഓളം മാത്രം.

ബിഹാറിലെ സോനെപൂർ ചന്ത മറ്റൊന്ന്​. ഏഷ്യയിലെ ഏറ്റവും വലിയ ചന്തയായി പറയുന്ന ഇവിടെ നവംബറിലാണ്​ എല്ലാ വർഷവും വൻ പ്രാതിനിധ്യത്തോടെ നടക്കാറുള്ളത്​. ഓരോ വർഷവും കാലികളുടെ എണ്ണം കുത്തനെ കുറഞ്ഞുവരുന്നു.