അപ്പോൾ ആ ചാനലിനെതിരെ രാജ്യദ്രോഹ കേസില്ലേ -ജസ്റ്റിസ് ചന്ദ്രചൂഢ്​

ന്യൂഡൽഹി: രാജ്യദ്രോഹ കേസ്​ ചുമത്തുന്നതിലെ വകതിരിവില്ലായ്​മയെ പരിഹസിച്ച്​ ജസ്റ്റിസ് ഡി.വൈ. ചന്ദ്രചൂഢ്​. മൃതദേഹങ്ങൾ നദിയിലേക്ക് വലിച്ചെറിയുന്നത്​ സംബന്ധിച്ച്​ ഒരു ചാനലിൽ വാർത്ത കണ്ടിരുന്നുവെന്ന്​ ജസ്റ്റിസ് എൽ നാഗേശ്വര റാവു പറഞ്ഞപ്പോഴാണ്​ 'അപ്പോൾ ആ ചാനലിനെതിരെ രാജ്യദ്രോഹ കേസൊന്നുമില്ലേ'' എന്ന്​ ജസ്റ്റിസ് ചന്ദ്രചൂഢ്​ പരിഹസിച്ചത്​.

തിങ്കളാഴ്ച സുപ്രീംകോടതിയിൽ മറ്റൊരു കേസിന്‍റെ വിചാരണക്കിടയിലായിരുന്നു മാധ്യമങ്ങൾക്കെതിരെ രാജ്യദ്രോഹ കേസുകൾ രജിസ്റ്റർ ചെയ്യുന്ന പ്രവണതയെ ജഡ്ജി കണക്കിന്​ പരിഹസിച്ചത്​. കോവിഡ്​ ബാധിതരുടെ ​മൃതദേഹങ്ങൾ മാന്യമായി കൈകാര്യം ചെയ്യുന്നതിന് മാർഗനിർദ്ദേശങ്ങൾ ആവിഷ്‌കരിക്കണമെന്ന് അമിക്കസ് ക്യൂറി സീനിയർ അഡ്വക്കേറ്റ് മീനാക്ഷി അറോറ സമർപ്പിച്ച ഹരജി പരിഗണിക്കുകയായിരുന്നു ഡിവിഷൻ ബെഞ്ച്​. ഇതിനിടെ, കോവിഡ് ബാധിച്ച രോഗികളുടെ മൃതദേഹങ്ങൾ നദിയിലേക്ക് വലിച്ചെറിയുന്നതിനെക്കുറിച്ച് ഒരു വാർത്ത ചാനലിൽ റിപ്പോർട്ട് കണ്ടതായി ജസ്റ്റിസ് എൽ. നാഗേശ്വര റാവു പറഞ്ഞു. ഇതിനുപിന്നാലെയാണ്​ "ആ വാർത്ത കാണിച്ചതിന് പ്രസ്​തത ചാനലിനെതിരെ രാജ്യദ്രോഹ കേസ് ഫയൽ ചെയ്തിട്ടുണ്ടോ എന്ന് എനിക്കറിയില്ല" എന്ന്​ ചന്ദ്രചൂഢ്​ പറഞ്ഞത്​.

ഈ കേസ്​ പരിഗണിച്ചതിന്​ ശേഷം ടിവി 5, എ.ബി.എൻ ആന്ധ്ര ജ്യോതി എന്നീ തെലുഗു വാർത്താ ചാനലുകളുടെ ഹർജികളായിരുന്നു കോടതിക്ക്​ മുമ്പാകെ എത്തിയത്​. ആന്ധ്രാപ്രദേശ് പൊലീസ് തങ്ങൾക്കെതിരെ രജിസ്റ്റർ ചെയ്​ത രാജ്യദ്രോഹ കേസ്​ തടയണമെന്നാവശ്യപ്പെട്ടായിരുന്നു ഇവരുടെ ഹരജി. തൊട്ടുമുൻപ്​ കഴിഞ്ഞ ഹരജിയിൽ വാദം കേൾക്കു​േമ്പാൾ ഈ വിഷയം തന്‍റെ മനസ്സിലുണ്ടായിരുന്നുവെന്ന്​ ​ജസ്റ്റിസ് ചന്ദ്രചൂഢ്​ പറഞ്ഞു. രാജ്യദ്രോഹത്തെക്കുറിച്ചുള്ള തന്‍റെ പ്രസ്​തുത പരാമർശം ഈ കേസിന്‍റെ പഴ്ചാത്തലത്തിലാണെന്നും അദ്ദേഹം വ്യക്​തമാക്കി.

പിന്നീട്​, ഈ ചാനലുകൾക്കെതിരെയുമുള്ള രാജ്യദ്രോഹക്കേസ്​ കോടതി സ്റ്റേ ചെയ്തു. രാജ്യദ്രോഹത്തിന്​ പരിധി നിശ്​ചയിക്കേ​ണ്ട സമയമാ​െയന്ന്​ ചൂണ്ടിക്കാട്ടിയ കോടതി ചാനലുകൾക്കെതിരെ രാജ്യദ്രോഹകേസ്​ എടുക്കാനുള്ള തീരുമാനം അവരുടെ അവകാശം ലംഘിക്കുന്നതാണെന്നും വ്യക്​തമാക്കി.

കോവിഡ്​ പ്രതിരോധത്തിൽ ആന്ധ്ര സർക്കാറിന്‍റെ നടപടികളെ വിമർശിച്ച​ വൈ.എസ്​.ആർ കോൺഗ്രസ്​ വിമത എം.പിയായ കാനുമുരി രഘുരാമ കൃഷ്​ണ രാജുവിന്‍റെ പ്രസ്​താവന റിപ്പോർട്ട്​ ചെയ്​തതിനാണ്​ ചാനലുകൾക്കെതിരെ ആന്ധ്ര സർക്കാർ നടപടിയെടുത്തത്​.