പൗരത്വ പ്രക്ഷോഭം: ജാമ്യം ലഭിച്ചവരെ നിമിഷങ്ങൾക്കകം വീണ്ടും അറസ്റ്റുചെയ്തു

ന്യൂഡൽഹി: പൗരത്വ പ്രക്ഷോഭത്തിൽ പ​ങ്കെടുത്തവരെ ഡൽഹി പൊലീസ്​ വേട്ടയാടുന്നത്​ തുടരുന്നു. കോടതി ജാമ്യത്തിൽ വിട്ട രണ്ട്​ വനിതകളെ നിമിഷങ്ങൾക്കകം മറ്റൊരു കേസിൽ ക്രൈംബ്രാഞ്ച്​ വീണ്ടും അറസ്​റ്റുചെയ്​തു. പിഞ്ച്ര തോഡ് പ്രവർത്തകരായ നടാഷ നർവാൾ, ദേവാംഗന കലിത എന്നിവരാണ്​ അറസ്​റ്റിലായത്​.  

ജാഫ്രാബാദിൽ മെട്രോ സ്​റ്റേഷനിൽ കുത്തിയിരിപ്പ്​ സമരം നടത്തിയതിന്​ ഫെബ്രുവരി 24 ന് രജിസ്റ്റർ ചെയ്ത എഫ്.ഐ.ആർ അനുസരിച്ചാണ്​ ഇരുവരെയും ആദ്യം അറസ്റ്റ് ചെയ്തത്​. ഇവർ ഇന്ത്യാ വിരുദ്ധ പ്രവർത്തനങ്ങളിൽ സജീവമാണെന്ന് ആരോപിച്ച്​ ഡൽഹി പൊലീസ് രണ്ട് ദിവസത്തെ കസ്റ്റഡി ആവശ്യപ്പെട്ടിരുന്നു. അപേക്ഷ തള്ളിയ മെട്രോപൊളിറ്റൻ മജിസ്‌ട്രേറ്റ് അജിത് നാരായണൻ ഇരുവർക്കും ജാമ്യം അനുവദിച്ചു.

ഇവർ അക്രമത്തിൽ ഏർപ്പെട്ടിട്ടില്ലെന്നും എൻ‌ആർ‌സി, സി‌എ‌എ എന്നിവയ്‌ക്കെതിരേ പ്രതിഷേധിക്കുക മാത്രമാണ്​ ചെയ്​തതെന്നും കോടതി നിരീക്ഷിച്ചു. ‘‘നല്ല വിദ്യാഭ്യാസമുള്ളവരാണ് പ്രതികൾ. സമൂഹത്തിൽ ശക്തമായ വേരുകളുണ്ട്. അന്വേഷണവുമായി ബന്ധപ്പെട്ട് പൊലീസുമായി സഹകരിക്കാൻ തയ്യാറാണ്. കോവിഡ് സാഹചര്യം കണക്കിലെടുക്കുമ്പോൾ പ്രതികളെ പൊലീസ് കസ്റ്റഡിയിൽ നൽകാൻ കഴിയില്ല’’ എന്നാണ്​ ജാമ്യം അനുവദിച്ച്​ കൊണ്ട്​ കോടതി അഭിപ്രായപ്പെട്ടത്​. 

തുടർന്നാണ്​ നാടകീയമായി ക്രൈംബ്രാഞ്ച്​ രംഗപ്രവേശം ചെയ്​തത്​. ഡൽഹി കലാപം, കൊലപാതകം എന്നിവയിൽ ഇരുവർക്കും ബന്ധമുണ്ടെന്നാരോപിച്ച്​ വീണ്ടും അറസ്റ്റ് ചെയ്യുകയായിരുന്നു. 147, 353, 307, 302 വകുപ്പുകളാണ്​ ഇവ​ർക്കെതിരെ ചുമത്തിയത്​. 

ജാമ്യം അനുവദിച്ച അതേ ജഡ്ജിയുടെ മുമ്പാകെ ഇരുവരെയും വീണ്ടും ഹാജരാക്കി. 14 ദിവസത്തെ റിമാൻഡാണ്​ ക്രൈംബ്രാഞ്ച് ആവശ്യപ്പെട്ടത്​. ഗൂഡാലോചന വ്യക്​തമാകാൻ പ്രതികളെ സമഗ്രമായി ചോദ്യം ചെയ്യേണ്ടതുണ്ടെന്നും കൂട്ടുപ്രതികളെ ക​ണ്ടെത്തേണ്ടതുണ്ടെന്നും അന്വേഷണ ഉദ്യോഗസ്ഥർ പറഞ്ഞു. 

നടാഷക്കും ദേവാംഗനക്കും വേണ്ടി ഹാജരായ അഭിഭാഷകരായ അദിത് എസ്. പുജാരി, തുഷാരിക മാട്ടൂ, കുനാൽ നേഗി എന്നിവർ ക്രൈംബ്രാഞ്ച് അപേക്ഷയെ എതിർത്തു. എന്നാൽ, കേസി​​​െൻറ വസ്തുതകളും സാഹചര്യങ്ങളും അന്വേഷണത്തി​​​െൻറ പ്രാരംഭ ഘട്ടവും പരിഗണിച്ച് ഇരുവരെയും രണ്ട് ദിവസത്തെ പൊലീസ് കസ്റ്റഡിയിൽ വിടുന്നതായി കോടതി ഉത്തരവിട്ടു.