തീർഥാടന സംഘം സഞ്ചരിച്ച മിനിവാന്‍ മറിഞ്ഞ് ഏഴ് പേർ മരിച്ചു
text_fields
അമരാവതി: ആന്ധ്രാപ്രദേശിലെ പലനാട് ജില്ലയിൽ തീർഥാടന സംഘം സഞ്ചരിച്ച മിനിവാന്‍ മറിഞ്ഞ് ഏഴ് പേർ മരിച്ചു. അപകടത്തിൽ പതിനൊന്ന് പേർക്ക് പരിക്കേറ്റു. ആറു പേർ സംഭവസ്ഥലത്തുവെച്ചും ഒരാൾ ആശുപത്രിയിൽ ചികിത്സയിലിരിക്കെയുമാണ് മരിച്ചതെന്ന് പൊലീസ് അറിയിച്ചു. ശ്രീശൈലത്തിലേക്ക് തീർത്ഥാടനത്തിന് പോയി മടങ്ങുകയായിരുന്ന 38 പേരാണ് വാനിൽ ഉണ്ടായിരുന്നത്.
അപകടത്തിൽ ഗുരുതരമായി പരിക്കേറ്റ ചിലരെ മെച്ചപ്പെട്ട ചികിത്സക്കായി ഗുണ്ടൂരിലെ സർക്കാർ ജനറൽ ആശുപത്രിയിലേക്ക് മാറ്റിയതായി പൊലീസ് പറഞ്ഞു. അപകടത്തിന്‍റെ കാരണം അന്വേഷിക്കുകയാണെന്ന് പൊലീസ് വ്യക്തമാക്കി.
അപകടത്തിൽ ദുഃഖം രേഖപ്പെടുത്തുന്നതായി തെലുങ്കുദേശം പാർട്ടി അധ്യക്ഷൻ എൻ ചന്ദ്രബാബു നായിഡു പറഞ്ഞു. മരിച്ചവരുടെ ബന്ധുക്കൾക്ക് സർക്കാർ സഹായം നൽകണമെന്നും പരിക്കേറ്റവർക്ക് മെച്ചപ്പെട്ട ചികിത്സ ഉറപ്പാക്കണമെന്നും അദ്ദേഹം ആവശ്യപ്പെട്ടു.