ഓപറേഷൻ പരിവർത്തന; ആന്ധ്ര പൊലീസ്​ നശിപ്പിച്ചത്​ 5964.85​ ഏക്കർ കഞ്ചാവ്​ തോട്ടം

അമരാവതി: ആന്ധ്രപ്രദേശിൽ ഒാപറേഷൻ പരിവർത്തനയുടെ ഭാഗമായി നടത്തിയ തെര​ച്ചിൽ കണ്ടെത്തി നശിപ്പിച്ചത്​ 5964.85​ ഏക്കർ കഞ്ചാവ്​ തോട്ടം. 29,82,425 കഞ്ചാവ്​ ചെടികളാണ്​ ആന്ധ്ര പൊലീസ്​ ഇതുവരെ നശിപ്പിച്ചത്​. ഏകദേശം 1491.2 കോടി രൂപവരും ഇതിനെന്നും ആ​ന്ധ്ര പൊലീസ്​ അറിയിച്ചു.

ആന്ധ്രയുടെ വിവിധ ഭാഗങ്ങളിലായിരുന്നു​ പൊലീസിന്‍റെ പരിശോധന. സാ​ങ്കേതിക വിദ്യയുയും എൻഫോഴ്​സ്​മെന്‍റ്​ -ഇന്‍റലിജൻസ്​ എന്നിവയും ഒരുമിച്ച്​ ചേർത്ത്​ സംസ്​ഥാനത്തുടനീളം കഞ്ചാവ്​ കൃഷിയും കടത്തും നിയന്ത്രണ വിധേയമാണെന്ന്​ ഉറപ്പാക്കാൻ പൊലീസ്​ കർമപദ്ധതി തയാറാക്കിയിരുന്നു.

ഒക്​ടോബർ 31 മുതലാണ്​ ആ​ന്ധ്ര​ പൊലീസ്​ ഓപറേഷൻ പരിവർത്തന ആരംഭിച്ചത്​. കഞ്ചാവിന്‍റെ ഉറവിടം കണ്ടെത്തി നശിപ്പിക്കുന്നതിന്​ പു​റമെ ആളുകളെ ബോധവത്​കരിക്കുകയും ചെയ്യും.