ഭാര്യയെ തീകൊളുത്തിയ ശേഷം രഹസ്യഭാഗത്ത്​ മുളകുപൊടി തേച്ചു; ക്രൂരത പകർത്തി പ്രചരിപ്പിച്ചയാൾ അറസ്റ്റിൽ

കാക്കിനാഡ (ആന്ധ്ര പ്രദേശ്​): ഭാര്യയെ ക്രൂരമായി പീഡിപ്പിച്ച്​​ കൊലപ്പെടുത്താൻ ശ്രമിച്ച കേസിൽ ഭർത്താവും ഭർതൃമാതാവും​ അറസ്റ്റിലായി. പ്രതി ഭാര്യയുടെ കൈ തിളച്ച എണ്ണയിൽ മുക്കുകയും രഹസ്യഭാഗത്ത്​ മുളകുപൊടി പുരട്ടുകയും തീകൊളുത്തി കൊല്ലാൻ ശ്രമിക്കുകയും ചെയ്​തതായി പൊലീസ്​ പറഞ്ഞു.

ആയുധം ഉപയോഗിച്ച്​ ദേഹത്ത്​ പരിക്കേൽപിക്കുന്നതിന്‍റെ ദൃശ്യങ്ങൾ പകർത്തി പ്രതി ​തന്നെ മറ്റുള്ളവർക്ക്​ അയച്ചുകൊടുത്തതോടെയാണ്​ സംഭവം പുറംലോകം അറിഞ്ഞത്​. ഈസ്റ്റ്​ ഗോദാവരി ജില്ലയിലെ ചട്ടി ഗ്രാമത്തിലാണ്​ സംഭവം. അമ്മ മാരിയമ്മ, ഭാര്യ ജയമ്മ എന്നിവർക്കൊപ്പമായിരുന്നു കല്യാണം വെങ്കണ്ണയുടെ താമസം.

10 വർഷം മുമ്പായിരുന്നു വെങ്കണ്ണയും തെലങ്കാനയിലെ ഭദ്രാചലം സ്വദേശിനിയായ ജയമ്മയും തമ്മിലുള്ള വിവാഹം. അവിഹിത ബന്ധം ആരോപിച്ച്​ രണ്ട്​ വർഷമായി ഭർത്താവും ഭർതൃമാതാവും ചേർന്ന്​ ജയമ്മയെ ശാരീരികമായും മാനസികമായും പീഡിപ്പിക്കുകയായിരുന്നു. മദ്യപാനിയായ വെങ്കണ്ണ മാതാവിന്‍റെ പിന്തുണയോടെയാണ്​ പീഡനം തുടർന്നത്​.

ഏപ്രിൽ മൂന്നിന്​ വെങ്കണ്ണ ജയമ്മയുടെ വലത്തേ കൈ തിളച്ച എണ്ണയിൽ മുക്കി. പിറ്റേദിവസം ജയമ്മ മാതാപിതാക്കളുടെ അടുത്തേക്ക്​ മടങ്ങിപ്പോയി.

മാതാപിതാക്കൾ ഫോണിലൂടെ വഴക്ക്​ പറഞ്ഞതിനെ തെറ്റ്​ ഏറ്റുപറഞ്ഞ വെങ്കണ്ണ ഏപ്രിൽ അഞ്ചിന്​ ജയമ്മയെ തിരികെ കൊണ്ടുവന്നു. ശേഷം നരസിംഹപുരം ഗ്രാമത്തിന്​ സമീപമുള്ള വനപ്രദേശത്തിൽ വെച്ച്​ പ്രതി ഭാര്യയെ പെട്രോൾ ഒഴിച്ച്​ തീ​െകാളുത്തി കൊല്ലാൻ ശ്രമിച്ചു. ജയമ്മയുടെ ഇടുപ്പ്​ വരെ പൊള്ളലേറ്റിരുന്നു.

വീട്ടിൽ കൊണ്ടുവന്ന്​ കൈകൾ കൂട്ടിക്കെട്ടിയ പ്രതി ജയമ്മയുടെ രഹസ്യഭാഗത്ത്​ മുളകുപൊടി തേച്ചു. പ്രതിയുടെ പിടിയിൽ നിന്ന്​ രക്ഷ​െപ​ട്ടോടിയ ജയമ്മ സ്വന്തം വീട്ടിലെത്തി. ഇതിനിടെ വെങ്കണ്ണയും അമ്മയും അവിടെയുമെത്തി ജയമ്മയെ കൊല്ലുമെന്ന്​ ഭീഷണി മുഴക്കി.

ഭദ്രാചലം പൊലീസ്​ നൽകിയ നിർദേശം അനുസരിച്ച്​ ജയമ്മയും മാതാപിതാക്കളും ചിന്തുരു പൊലീസ്​ സ്​റ്റേഷനിലെത്തി പരാതി നൽകി. ചിന്തുരു സർക്കാർ ആശുപത്രിയിൽ ചികിത്സയിൽ കഴിയുകയാണ്​ ജയമ്മ ഇപ്പോൾ.

മുമ്പ്​ കല്യാണം സുനിത എന്ന സ്​ത്രീയെ വിവാഹം ചെയ്​ത വെങ്കണ്ണ അവരെയും ക്രൂരമായി പീഡിപ്പിക്കാറുണ്ടായിരുന്നുവെന്ന്​ പൊലീസ്​ പറഞ്ഞു. ​ആദ്യ വിവാഹത്തെ കുറിച്ച്​ മറച്ചുവെച്ചാണ്​ വെങ്കണ്ണ ജയമ്മയെ വിവാഹം ചെയ്​തത്​.