ചാന്ദ്​നി ചൗക്ക്​ സംഘർഷം; അമിത്​ ഷാ ഡൽഹി പൊലീസ്​ മേധാവിയെ വിളിച്ചു വരുത്തി

ന്യൂഡൽഹി: ചാന്ദ്​നി ചൗക്കിലെ ഹൗസ്​ ഖാസിയിൽ വാഹനം നിർത്തിയിട്ടതുമായി ബന്ധപ്പെട്ടുണ്ടായ തർക്കം ഇരുമതവിഭാഗങ്ങൾ തമ്മിലുള്ള വർഗീയ സംഘർഷമായി മാറിയ സംഭവത്തിൽ കേന്ദ്ര ആഭ്യന്തര വകുപ്പ്​ മന്ത്രി അമിത്​ ഷാ ഡൽഹി പൊലീസ്​ മേധാവിയെ വിളിച്ചു വരുത്തി. പ്രദേശത്ത്​ സ്ഥിതിഗതികൾ നിയന്ത്രണ വിധേയമാണെന്ന്​ പൊലീസ്​ മേധാവി അമൂല്യ പട്​നായിക്​ പറഞ്ഞു.

സംഭവവുമായി ബന്ധപ്പെട്ട്​ നാല്​ പേർ അറസ്​റ്റിലായതായും സംഘർഷത്തിൽ ഉൾപ്പെ​ട്ട മുഴുവൻ ആളുകൾക്കെതിരെയും നടപടി എടുക്കുമെന്നും അദ്ദേഹം വ്യക്തമാക്കി. സി.സി ടിവി ദൃശ്യങ്ങൾ ലഭിച്ചിട്ടുണ്ട്​. ഒരു കൂട്ടം ക്രിമിനലുകളാണ്​ സംഭവത്തിന്​ പിന്നിൽ. ദൃശ്യം പരിശോധിച്ച്​ വരികയാണ്​. സംഭവവുമായി ബന്ധപ്പെട്ടവരെല്ലാം നടപടി നേരി​ടുമെന്നും അമൂല്യ പട്​നായിക്​ കൂട്ടിച്ചേർത്തു.

അറസ്റ്റിലായവരിൽ പ്രായപൂർത്തിയാവാത്ത ഒരാളുമുണ്ട്​. സുരക്ഷാ ജീവനക്കാർ, പൊലീസ്​, സി.ആർ.പി.എഫ്​ തുടങ്ങി ആയിരത്തിലധികം പേരെ പ്രദേശത്ത്​ വിന്യസിച്ചിട്ടുണ്ട്​. ഞായറാഴ്​ച മുതൽ പ്രദേശത്തെ കടകളെല്ലാം അടഞ്ഞു കിടക്കുകയാണ്​. പ്രദേശവാസികൾ സ്ഥലത്ത്​ സമാധാന മാർച്ച്​ നടത്തി.

ചാന്ദ്​നിചൗക്കിലെ ആസ്​ മുഹമ്മദ്​ എന്നയാൾ ത​​െൻറ വീടിന്​ പുറത്ത്​ വാഹനം നിർത്തിയതുമായി ബന്ധപ്പെട്ട്​ സഞ്​ജീവ്​ ഗുപ്​ത എന്ന ഒരു പഴ വിൽപനക്കാരനുമായി തുടങ്ങിയ വാക്​ തർക്കമാണ്​ പിന്നീട്​ വലിയ വർഗീയ സംഘർഷത്തിലേക്ക്​ എത്തിപ്പെട്ടത്​.

തർക്കത്തെ തുടർന്ന്​ ആസ്​ മുഹമ്മദ്​ കുറച്ച്​ ആളുകളുടെ സഹായത്തോടെ സഞ്​ജീവ്​ ഗുപ്​തയുടെ വീട്​ ആക്രമിച്ചു. ഇതേതുടർന്ന്​ സഞ്​ജീവ്​ ഗുപ്​ത പൊലീസിനെ വിളിച്ചു. പൊലീസ്​ ആസ്​ മുഹമ്മദിനെ കസ്​റ്റഡിയിലെടുത്ത്​ ചോദ്യം ചെയ്യുന്നതിനിടെ ഒരു കൂട്ടമാളുകൾ അദ്ദേഹത്തെ വിട്ടയക്കണമെന്നാവശ്യപ്പെട്ട്​ പൊലീസ്​ സ്​റ്റേഷന്​ പുറത്ത്​ ബഹളം വെച്ചു. ഇതി​​െൻറ തുടർച്ചയെന്നോണം ഒരു സംഘമാളുകൾ പ്രദേശത്തെ ക്ഷേത്രം ആക്രമിക്കുകയും വിഗ്രഹം തകർക്കുകയുമായിരുന്നു. ഇതേതുടർന്ന്​ പ്രദേശത്ത്​ കല്ലേറ്​ നടക്കുകയും സംഘർഷാവസ്ഥയിലേക്ക്​ നീങ്ങുകയും ചെയ്​തു.

ക്ഷേത്രം തകർത്ത സംഭവത്തെ നിരിവധി രാഷ്​ട്രീയ പ്രവർത്തകർ അപലപിച്ചു. തകർക്കപ്പെട്ട ക്ഷേത്രം കേന്ദ്ര മന്ത്രി ഹർഷ്​ വർധൻ ചൊവ്വാഴ്​ച സന്ദർശിച്ചിരുന്നു. സംഭവം ദൗർഭാഗ്യകരവും വേദനാജനകരവുമാണെന്ന്​ അദ്ദേഹം അഭിപ്രായപ്പെട്ടു.