കശ്​മീരിൽ സമാധാനം പുലർന്നെന്ന്​ അമിത്​ ഷാ

ന്യൂഡൽഹി: ഭരണഘടനയുടെ 370ാം വകുപ്പ്​ റദ്ദാക്കിയതോടെ കശ്​മീരിൽ സമാധാനം പുലർന്നുവെന്ന്​ കേന്ദ്ര ആഭ്യന്തര മന്ത്രി അമിത്​ ഷാ. ഈ വകുപ്പ്​ ഉണ്ടായിട്ടും ഏഴരപ്പതിറ്റാണ്ട്​ സമാധാനം ഉണ്ടായില്ല. ഇപ്പോൾ വ്യാപാര നിക്ഷേപം കൂടി. വിനോദസഞ്ചാരികളുടെ വരവ്​ കൂടി. ഹിന്ദുസ്​ഥാൻ ടൈംസി​‍െൻറ നേതൃ ഉച്ചകോടിയിൽ സംസാരിക്കുകയായിരുന്നു അദ്ദേഹം.

370ാം വകുപ്പ്​ പുനഃസ്​ഥാപിക്കാതെ കശ്​മീരിൽ സമാധാനം പുലരില്ലെന്ന ജമ്മു-കശ്​മീർ മുൻ മുഖ്യമന്ത്രി ഫാറൂഖ്​ അബ്​ദുല്ലയുടെ നിരീക്ഷണത്തിനെതിരെയായിരുന്നു അമിത്​ ഷായുടെ പ്രത്യാക്രമണം. 1990ലും 370 ാം വകുപ്പ്​ ഉണ്ടായിരുന്നു. അന്നും സമാധാനം പുലർന്നില്ല. ഇന്ന്​ കശ്​മീരിൽ ഭരണസ്​ഥിരത കൈവന്നു. മാറ്റത്തെ കശ്​മീരി ജനത സ്വാഗതം ചെയ്​തതായാണ്​ കരുതുന്നത്​. ഈ രാഷ്​ട്രീയ ജനാധിപത്യ പ്രക്രിയയിൽ രാഷ്​ട്രീയ പാർട്ടികളെല്ലാം പങ്കുകൊള്ളണമെന്നും അദ്ദേഹം അഭ്യർഥിച്ചു.