അവിശ്വാസം: എ.​െഎ.എ.ഡി.എം.കെ, ടി.ആർ.എസ്​ നേതാക്കളെ കണ്ട്​ അമിത്​ ഷാ

ന്യൂഡൽഹി: മോദി സർക്കാറിനെതിരായ ആദ്യ അവിശ്വാസ പ്രമേയം ഇന്ന്​ അവതരിപ്പിക്കാനിരിക്കെ നിഷ്​പക്ഷ കക്ഷികളെ കൂട്ടുപിടിക്കാനായി​ ബി.ജെ.പി ദേശീയാധ്യക്ഷൻ അമിത്​ ഷാ. എ.​െഎ.എ.ഡി.എം.കെ, ചന്ദ്രശേഖര റാവുവി​​െൻറ തെലങ്കാന രാഷ്​ട്ര സമിതി എന്നീ പാർട്ടി നേതാക്കളുമായി അമിത്​ ഷാ കൂടിക്കാഴ്​ച നടത്തി. എ.​െഎ.എ.ഡി.എം.കെയും തെലങ്കാന രാഷ്​ട്ര സമിതിയും സർക്കാറിന്​ അനുകൂലമായി വോട്ടു ചെയ്യുമെന്നാണ്​ സൂചന. 

അതേസമയം, ഇടഞ്ഞു നിൽക്കുന്ന സഖ്യകക്ഷി ശിവസേന അവസാന നിമിഷം സർക്കാറിന്​ ഭീഷണി ഉയർത്തിക്കൊണ്ട്​ പാർട്ടി എം.പിമാർക്ക്​ നൽകിയ വിപ്പ്​ പിൻവലിച്ചു. സർക്കാറിന്​ അനുകൂലമായി വോട്ടു ചെയ്യാനാവ​ശ്യപ്പെട്ട്​ നൽകിയ വിപ്പാണ്​ ശിവസേന പിൻവലിച്ചത്​. ഇതോടെ ശിവസേന എം.പിമാരിൽ ചിലർ മറിച്ച്​ വോട്ടു ചെയ്യുമെന്ന്​ ഉറപ്പായി. നവീൻ പട്​നായിക്കി​​​െൻറ ബി.ജെ.ഡി വോ​െട്ടടുപ്പിൽ നിന്ന്​ വിട്ടു നിൽക്കും. 

തത്​കാലം സർക്കാറിന്​ ഭീഷണിയില്ലെങ്കിലും പ്രതിപക്ഷത്തി​​​െൻറ വോട്ടു കുറക്കുക എന്നാണ്​ ഭരണപക്ഷം ലക്ഷ്യമിടുന്നത്​. 533 അംഗ സഭയിൽ എൻ.ഡി.എക്ക്​ 314 അംഗങ്ങളുണ്ട്​. 267 പേർ പിന്തുണച്ചാൽ ഭൂരിപക്ഷം ലഭിക്കും. അവിശ്വാസ പ്രമേയത്തെ പിന്തുണക്കുന്നവർ 152 പേരാണുള്ളത്​ എന്നിരിക്കെ സർക്കാറിന്​ ഭീഷണിയില്ല.