'അത്​ അദ്ദേഹത്തിന്‍റെ മഹാമനസ്കത'; ജാഗ്രതയോടെ പരസ്പരം പുകഴ്ത്തി മയാവതിയും അമിത്​ഷായും

ഉത്തർപ്രദേശിലെ നിയമസഭ തെരഞ്ഞെടുപ്പ്​ ഫലം വരാനിരിക്കെ ബി.എസ്​.പി നേതാവ്​ മായാവതിയും ബി.ജെ.പി നേതാവ്​ അമിത്​ഷായും തമ്മിലുള്ള അഭിപ്രായ പ്രകടനങ്ങൾ വാർത്തകളിൽ നിറയുകയാണ്​. പരസ്പരം കുറ്റപ്പെടുത്താതെയും ജാഗ്രതയോടെ പുകഴ്ത്തിയുമാണ്​ ഇരുവരുടെയും പ്രസ്താവനകൾ.

മയാവതിയുടെ പ്രസക്​തി നഷ്ടമായിട്ടില്ലെന്നായിരുന്നു കഴിഞ്ഞ ദിവസം ഒരു അഭിമുഖത്തിൽ അമിത്​ ഷാ പറഞ്ഞത്​. ഇതേ കുറിച്ചുള്ള പ്രതികരണം തേടിയ മാധ്യമ പ്രവർത്തകരോട്​ മയാവതി പ്രതികരിച്ചതിങ്ങനെ: 'സത്യം തിരിച്ചറിഞ്ഞത്​ അദ്ദേഹത്തിന്‍റെ മഹാമനസ്കത കൊണ്ട്​'.

യു.പി നിയമസഭ തെരഞ്ഞെടുപ്പിൽ ബി.ജെ.പിയും സമാജ്​വാദി പാർട്ടിയും തമ്മിലാണ്​ പ്രധാന മത്സരം. സവർണ-മുന്നാക്ക വോട്ടുകളാണ്​ ബി.ജെ.പി പ്രധാനമായും ലക്ഷ്യമിടുന്നത്​. ദലിത്​-മുസ്​ലിം-പിന്നാക്ക വോട്ടുകളിലാണ്​ സമാജ്​വാദിയുടെ പ്രതീക്ഷ. പിന്നാക്ക വോട്ടുകളാണ്​ ബി.എസ്​.പിയുടെ ശക്​തി. ബി.എസ്​.പി ദലിത്​-മുസ്​ലിം വോട്ടുകൾ സമാഹരിക്കുന്നത്​ വോട്ട്​ ഭിന്നിക്കാനും ബി.ജെ.പിക്ക്​ വിജയത്തിനും സഹായകരമാകുമോ എന്നാണ്​ അഭിമുഖത്തിൽ അമിത്​ ഷായോട്​ ചോദിച്ചത്​. മായാവതിയുടെ പ്രസ്ക്​തി നഷ്ടപ്പെട്ടിട്ടില്ലെന്നായിരുന്നു അമിത്​ ഷായുടെ മറുപടി.

സത്യം തിരിച്ചറിഞ്ഞത്​ അദ്ദേഹത്തിന്‍റെ മഹാമനസ്കതയാണെന്നായിരുന്നു മയാവതി പ്രതികരിച്ചത്​. 'ബി.ജെ.പിക്കും എസ്​.പിക്കും പകരം ബി.എസ്​.പി വിജയക്കുമോയെന്ന്​ ആർക്കറിയാം. എല്ലാം കാലം തീരുമാനിക്കും' -ജാഗ്രതയോടെയായിരുന്നു മായാവതിയുടെ പ്രതികരണം.

അതേസമയം, സമാജ്​വാദി പാർട്ടിക്കെതിരെ രൂക്ഷ വിമർശനം ഉന്നയിക്കാനും അവർ തയാറായി. 'എസ്​.പിയെ വോട്ടർമാർ തള്ളിയതാണ്​. ആ പാർട്ടി അധികാരത്തിലെത്തുമ്പോഴെല്ലാം ഗുണ്ടാരാജാണിവിടെ' - ബി.ജെ.പിയുടെ ആരോപണങ്ങൾ ആവർത്തിച്ചുകൊണ്ട്​ മായാവതി പറഞ്ഞു. നേരത്തെ യു.പിയിൽ ക്രിമനലുകളുടെ ഭരണമായിരുന്നെന്നും ഗുണ്ടാരാജ്​ അവസാനിച്ചത്​ യോഗി ആദിത്യനാഥ്​ അധികാരത്തിലെത്തിയപ്പോഴാണെന്നും കഴിഞ്ഞ ദിവസം അമിത്​ ഷാ പറഞ്ഞിരുന്നു.

എസ്​.പിക്കെതിരെ വിമർശനം ഉന്നയിച്ചപ്പോഴും സംസ്ഥാനത്തെ ബി.ജെ.പി സർക്കാറിനെതിരെ മായാവതി വിമർശനങ്ങളൊന്നും ഉന്നയിച്ചിട്ടില്ല.