കർണാടകയിൽ വാരാന്ത്യ കർഫ്യൂ പ്രഖ്യാപിച്ചു

ബംഗളൂരു: കർണാടകയിൽ കോവിഡ്​ മൂന്നാം തരംഗം റിപ്പോർട്ട്​ ചെയ്തതോടെ വാരാന്ത കർഫ്യൂ പ്രഖ്യാപിച്ചു. ചൊവ്വാഴ്ച പ്രതിദിന കൊവിഡ്​ പൊസിറ്റിവ്​ കേസ്​ 2000 കടന്നതിന്​ പിന്നാലെയാണ്​ പ്രഖ്യാപനം.

മുഖ്യമന്ത്രി ബസവരാജ്​ ബൊമ്മൈയുടെ നേതൃത്വത്തിൽ രാത്രി രണ്ടര മണിക്കൂറോളം അടിയന്തരയോഗത്തിൽ ആരോഗ്യമന്ത്രി കെ. സുധാകർ, റവന്യൂ മന്ത്രി ആർ. അശോക തുടങ്ങിയവർ പ​ങ്കെടുത്തു. വെള്ളിയാഴ്ച രാത്രി 10മുതൽ തിങ്കളാഴ്ച പുലർച്ചെ അഞ്ചുവരെയാണ്​ വാരാന്ത കർഫ്യൂ. ജനുവരി ആറു മുതൽ രണ്ടാഴ്ചത്തേക്ക്​ ആദ്യഘട്ടത്തിൽ വാരാന്ത കർഫ്യൂ പ്രഖ്യാപിച്ചിരിക്കുന്നത്​. സ്ഥിതിഗതികൾ നിയന്ത്രണ വിധേയമായില്ലെങ്കിൽ കൂടുതൽ കർശന നടപടികൾ സ്വീകരിക്കുമെന്ന്​ ആരോഗ്യ മന്ത്രി അറിയിച്ചു.

നിലവിൽ ജനുവരി ഏഴു വരെ രാത്രി 10 മുതൽ പുലർച്ചെ അഞ്ചുവരെ രാത്രി കർഫ്യൂ നിലനിൽക്കുന്നുണ്ട്​. സംസ്ഥാനത്തെ ഭൂരിഭാഗം കേസുകളും ബംഗളൂരു നഗരത്തിലായതിനാൽ ബംഗളൂരുവിൽ കൂടുതൽ നിയന്ത്രണങ്ങളേർപ്പെടുത്തും.

ചൊവ്വാഴ്ച 142 ഒമിക്രോൺ കേസുകൾ കർണാടകയിൽ സ്ഥിരീകരിച്ചിട്ടുണ്ട്​. കഴിഞ്ഞ മൂന്ന്​ ദിവസത്തിനിടെ കോവിഡ്​ പൊസിറ്റിവ്​ കേസുകൾ ഇരട്ടിയായിരുന്നു. തിങ്കളാഴ്ച 1290 പേർക്കും ചൊവ്വാഴ്ച 2053 പേർക്കുമാണ്​ രോഗബാധ സ്ഥിരീകരിച്ചത്​.

പുതിയ ഉത്തരവ്​ പ്രകാരം, ബംഗളൂരു നഗരത്തിൽ 10,11,12 ക്ലാസുകൾ ഒഴികെ എല്ലാ സ്കൂളുകളും മെഡിക്കൽ, പാരാ മെഡിക്കൽ കോളജുകൾ ഒഴികെ എല്ലാ കോളജുകളും വ്യാഴാഴ്ച മുതൽ അടച്ചിടും. പബ്ബുകൾ, ക്ലബ്ബുകൾ, റസ്റ്ററന്‍റുകൾ,ബാറുകൾ, ഹോട്ടലുകൾ തുടങ്ങിയവ സീറിങ്​ കപ്പാസിറ്റിയിൽ 50 ശതമാനം ആളുകളെ മാത്രം പ്രവേശിപ്പിച്ച്​ പ്രവർത്തിപ്പിക്കും. സിനിമഹാൾ, മൾട്ടപ്ലക്സ്​,തിയറ്റർ, ഓഡിറ്റോറിയം എന്നിവയിലും പകുതി ആളുകളെ മാത്രമേ അനുവദിക്കൂ.