ഞാൻ പാർട്ടി അധ്യക്ഷനല്ല; പുതിയ പ്രസിഡൻറ്​ ഉടൻ വേണം -രാഹുൽ

ന്യൂഡൽഹി: കോൺഗ്രസിന്​ പുതിയ അധ്യക്ഷനെ കാലതാമസമില്ലാതെ ഉടൻ തെരഞ്ഞെടുക്കണമെന്ന്​ രാഹുൽ ഗാന്ധി. താൻ നേരത്തേ രാജി സമർപ്പിച്ചതിനാൽ തെരഞ്ഞെടുപ്പ്​ പ്രക്രിയയിൽ ഇടപെടില്ലെന്നും കോൺഗ്രസ്​​ വർക്കിങ്​ കമ്മറ്റി എത്രയും പെ​ട്ടെന്ന്​ യോഗം വിളിച്ച്​ പുതിയ അധ്യക്ഷ​നെ തെരഞ്ഞെടുക്കണമെന്നും അദ്ദേഹം ആവശ്യപ്പെട്ടു.

‘‘പുതിയ അധ്യക്ഷ​​െൻറ കാര്യത്തിൽ പാർട്ടി ഉടൻ തീരുമാനം കൈക്കൊള്ളണം. ഞാൻ നേരത്തേ രാജി സമർപ്പിച്ചതാണ്​. ഞാൻ പാർട്ടി അധ്യക്ഷനല്ല. ’’ രാഹുൽ പറഞ്ഞു.

പാർട്ടി പ്രസിഡൻറ്​ പദവിയിൽ നിന്നുള്ള ത​​െൻറ രാജിയിൽ ഒരു പുനർവിചിന്തനം ഇല്ലെന്ന്​ വ്യക്തമാക്കുന്നതാണ്​ രാഹുലി​​െൻറ പ്രസ്​താവന. ലോക്​സഭ തെരഞ്ഞെടുപ്പിൽ കോൺഗ്രസ് ഏറ്റുവാങ്ങിയ ദയനീയ പരാജയത്തെ തുടർന്ന്​​ മെയ്​ 25നാണ്​ രാഹുൽ ഗാന്ധി പാർട്ടി അധ്യക്ഷ പദവിയിൽ നിന്ന്​ രാജി സമർപ്പിച്ചത്. രാഹുൽ രാജി പിൻവലിക്കണമെന്ന്​ മുതിർന്ന നേതാക്കൾ നിരന്തരം ആവശ്യപ്പെടുന്നു​െണ്ടങ്കിലും അദ്ദേഹം വഴങ്ങിയിട്ടില്ല. നിലവിൽ പാർട്ടി അധ്യക്ഷ​​െൻറ ചുമതലകളിൽ നിന്ന്​ വിട്ടു നിൽക്കുകയാണ്​ രാഹുൽ ഗാന്ധി.