അലിഗഢ് സർവകലാശാലയിലും പൊലീസ് അതിക്രമം; വിദ്യാർഥികൾക്ക് പരിക്ക് -VIDEO

ന്യൂഡൽഹി: ജാമിഅ മില്ലിയക്ക്​ പിറകെ അലീഗഢ്​ മുസ്​ലിം സർവകലാശാലയിലും പൗരത്വ ബില്ലിനെതിരായ പ്രക്ഷോഭ​ത്തിന്​ നേരെ നടത്തിയ അതിക്രമത്തിൽ നൂറിലേറെ വിദ്യാർഥികൾക്ക്​ പരിക്കേറ്റു. കാമ്പസിനകത്ത്​ ലാത്തിച്ചാർജും കണ്ണീർവാതക പ്രയോഗവും നടത്തിയ പൊലീസിനുനേരെ വിദ്യാർഥികൾ നടത്തിയ കല്ലേറിൽ പൊലീസുകാരന്​ പരിക്കേറ്റ​ു. പരിക്കേറ്റവരെ അലീഗഢ്​​ മെഡിക്കൽ കോളജ്​ ആശുപത്രിയിൽ പ്രവേശിപ്പിച്ചു​. ഇവരിൽ മലയാളികൾ ഉള്ളതായി അറിവില്ല. ഇവിടുത്തെ ഇൻറർനെറ്റ്​ സേവനം 24 മണിക്കൂർ ​റദ്ദാക്കിയിട്ടുണ്ട്​.

ജാമിഅയിലെ പൊലീസ്​ അതിക്രമങ്ങളറിഞ്ഞ്​ രാത്രി അലീഗഢ്​​ സർവകലാശാലയിൽനിന്ന് പ്രകടനമായി കാമ്പസിന്​ പുറത്തേക്ക്​ നീങ്ങിയ വിദ്യാർഥികളെ ഗേറ്റിൽ തടഞ്ഞാണ്​ ലാത്തിച്ചാർജും കണ്ണീർവാതക പ്ര​േയാഗവും നടത്തിയത്​. രാത്രി എട്ടുമണിക്ക്​ ശേഷമായിരുന്നു ഇത്​. ലാത്തിച്ചാർജ്​ ചെയ്​ത്​ കാമ്പസിനുള്ളിലേക്ക്​ കടന്ന പൊലീസ്​ സംഘം കണ്ണിൽ കണ്ട വാഹനങ്ങളെല്ലാം അടിച്ചുതകർത്തു.

ഇതിനിടെ നടന്ന കല്ലേറിലാണ്​ പൊലീസുകാരന്​ പരിക്കേറ്റത്​. കാമ്പസിന്​ പുറത്തേക്ക്​ വന്ന വിദ്യാർഥികളെ അകത്തേക്കുതന്നെ അയക്കാനാണ്​ ലാത്തിച്ചാർജ്​ ചെയ്​തതെന്ന്​ പൊലീസ്​ ന്യായീകരിച്ചു. രാത്രി ഒമ്പതുമണിയോടെ കാമ്പസിൽ ദ്രുതകർമസേനയുമിറങ്ങി. പൗരത്വ ദേഭഗതി നിയമത്തിനെതിരെ ആദ്യം സമരം തുടങ്ങിയ കാമ്പസുകളിലൊന്നാണ്​ അലീഗഢ്​​. ആയിരക്കണക്കിന്​ വിദ്യാർഥികൾ ഉപവാസ സമരം നടത്തിയ കാമ്പസിൽ ദിവസവും മുടങ്ങാതെ സമരം നടന്നുവരുകയായിരുന്നു.

ഡൽഹി ജാമിയ മില്ലിയ സർവകലാശാല വിദ്യാർഥികൾ നടത്തിയ സമരത്തെ പൊലീസ് അതിക്രൂരമായി നേരിട്ടിരുന്നു. നിരവധി വിദ്യാർഥികൾക്ക് ഗുരുതരമായി പരിക്കേറ്റിരുന്നു.