ചൈനയുടെ​ ലക്ഷ്യങ്ങൾ പലത്​; പ്രതിരോധമന്ത്രി വസ്തുത വ്യക്തമാക്കണം -ആൻറണി

ന്യൂഡല്‍ഹി: ലഡാക്കിലെ ഗാൽവാൻ താഴ്‌വരയിൽ ചൈന നടത്തിയ​ ആക്രമണത്തിന്​ പിന്നിൽ പല ലക്ഷ്യങ്ങളും ഉണ്ടാകുമെന്ന്​ മുൻ പ്രതിരോധ മന്ത്രിയും കോൺഗ്രസ്​ നേതാവുമായ എ.കെ. ആൻറണി. കിഴക്കന്‍ ലഡാക്കില്‍ ചൈനയുടെ ഭാഗത്ത് നിന്നുണ്ടായ പ്രകോപനത്തിന് പിന്നില്‍ മറ്റെന്തെങ്കിലും ലക്ഷ്യങ്ങള്‍ ഉണ്ടോ എന്ന് സംശയിക്കേണ്ടിയിരിക്കുന്നു. 

മുന്‍ പ്രതിരോധമന്ത്രി എന്ന നിലയില്‍ സര്‍ക്കാര്‍ വിശദീകരണം വരുന്നതിന് മുമ്പ്​ കൂടുതല്‍ പ്രതികരിക്കാന്‍ സാധിക്കില്ല. ഔദ്യോഗിക വിശദീകരണം വന്ന ശേഷം മാത്രമേ എന്തെങ്കിലും പറയാന്‍ സാധിക്കുകയുള്ളൂ എന്നും അദ്ദേഹം പറഞ്ഞു. 

ഇന്ത്യയുടെ റോഡ് നിര്‍മാണം തടസപ്പെടുത്താന്‍ മാത്രമാണ്​ ചൈനയുടെ പ്രകോപനമെന്ന് കരുതുന്നില്ല. അതിര്‍ത്തിയില്‍ ഇന്നലെ ഉണ്ടായ സംഘര്‍ഷത്തിൻെറ വസ്​തുതകൾ പ്രധാനമന്ത്രിയോ പ്രതിരോധമന്ത്രിയോ വ്യക്തമാക്കണം. 

1975ന്​ ശേഷം ഇന്ത്യ-ചൈന അതിര്‍ത്തിയില്‍ സൈനികര്‍ തമ്മിൽ ഉരസലുകൾ ഉണ്ടായിട്ടുണ്ടെങ്കിലും മരണം ഉണ്ടായിട്ടില്ല.  നിലവിൽ അതിര്‍ത്തിയില്‍ ആഴ്ചകളായി സംഘര്‍ഷം നിലനില്‍ക്കുന്നുണ്ട്. ചൈനീസ് സൈന്യം തന്ത്രപ്രധാനമായ ഇന്ത്യന്‍ മേഖലകളിലേക്ക് കടന്നുകയറി. സമാധാനപരമായി പരിഹരിക്കാനുള്ള ശ്രമങ്ങള്‍ നടന്നിട്ടുണ്ടെന്നും ആൻറണി പറഞ്ഞു.