ഡോവലി​െൻറ മകനെതിരെയും ഗുരുതര ആരോപണങ്ങളുമായി വയർ

ന്യൂഡൽഹി: അമിത്​ ഷായുടെ മകന്​ പിറകേ ഇന്ത്യൻ സുരക്ഷ ഉപദേഷ്​ടാവ്​ അജിത്​ ഡോവലി​​െൻറ മകൻ ​ശൗര്യക്കെതിരെയും ഒാൺലൈൻ മാധ്യമമായ ദ വയർ  രംഗ​ത്ത്​.  ശൗര്യ മുഖ്യനടത്തിപ്പുകാരനായ ഇന്ത്യ ഫൗണ്ടേഷൻ എന്ന സംഘടനക്കെതിരെയാണ്​ വയർ ഗുരുതര സാമ്പത്തിക ആരോപണങ്ങൾ ഉയർത്തിയിരിക്കുന്നത്​​​. വിദേശകമ്പനികളിൽ നിന്ന്​ സംഘടനക്ക്​ അനധികൃതമായി  സംഭാവനകൾ ലഭിക്കുന്നുവെന്നാണ്​ വയറി​​െൻറ മുഖ്യ ആരോപണം. ഇതിനായി ബി.ജെ.പി സർക്കാർ വഴിവിട്ട സഹായം നൽകിയെന്നും വയർ കുറ്റപ്പെടുത്തുന്നു. പ്രതിരോധമന്ത്രി നിർമല സീതാരാമൻ കേന്ദ്രമന്ത്രിസഭയിലെ സഹമന്ത്രിമാരായ ജയന്ത്​ സിൻഹ, എം.ജെ.അക്​ബർ എന്നിവർ ഇന്ത്യ ഫൗണ്ടേഷനിൽ ഡയറക്​ട​ർമാരാണ്​.

ഇന്ത്യ ആയുധ ഇടപാടുകൾ നടത്തുന്ന കമ്പനികളിൽ നിന്ന്​ ഇന്ത്യ ഫൗണ്ടേഷൻ സംഭാവനകൾ സ്വീകരിക്കുന്നുണ്ട്​. പ്രതിരോധ മന്ത്രി ഡയറക്​ടറായ സംഘടന ഇത്തരത്തിൽ സംഭാവനകൾ സ്വീകരിക്കുന്നത്​ ഗൗരവതരമാണ്​. ഫൗണ്ടേഷ​​െൻറ സെമിനാറുകളിൽ ചിലത്​ സ്​പോൺസർ ചെയ്​തത്​ ബോയിങ്​ കമ്പനിയാണ്​. 111 ബോയിങ് വിമാനങ്ങൾ വാങ്ങാനുള്ള 70,000 കോടിയുടെ ​കരാർ സംബന്ധിച്ച്​ സി.ബി.​െഎ അന്വേഷണം നടക്കു​േമ്പാഴാണ് ഇന്ത്യ  ഫൗണ്ടേഷന്​ ബോയിങ്​ കമ്പനി സംഭാവന നൽകിയിരിക്കുന്നത്​​. കമ്പനിയുടെ ഡയർകട്​ർമാരി​ലൊരാളായി വ്യോമ​യാന സഹമന്ത്രി ജയന്ത്​ സിൻഹയുമുണ്ടെന്നത്​ സംഘടനയുടെ പ്രവർത്തനങ്ങളെ സംബന്ധിച്ച്​ സംശയങ്ങളുയർത്തുന്നുണ്ട്​.

എന്നാൽ വരുമാന സ്രോതസുകളെ കുറിച്ചുള്ള വിവരങ്ങൾ ഇന്ത്യ ഫൗണ്ടേഷൻ വ്യക്​തമാക്കിയിട്ടില്ല. കോൺഫറൻസുകളും ​ജേണലുകളിൽ പ്രസിദ്ധീക്കുന്ന പരസ്യവുമാണ്​ പ്രധാന​ വരുമാനമാർഗമെന്നു ശൗര്യ ഡോവൽ പറയുന്നു. എന്നാൽ കാര്യമായി ​ജേണലുകളിൽ പരസ്യമില്ലെന്ന്​ വയർ ആരോപിക്കുന്നു. എന്നിട്ടും ന്യൂഡൽഹിയിലെ സമ്പന്ന മേഖലയിൽ പ്രവർത്തിക്കുന്ന ഒാഫീസി​​െൻറ വാടക, ജീവനക്കാരുടെ ശമ്പളം എന്നിവ എങ്ങനെ നൽകുന്നു എന്നത്​ ചോദ്യചിഹ്​നമാവുകയാണ്​.