രാജ്യത്ത്​ കോവിഡ്​ വ്യാപനം രൂക്ഷമായത്​​​ രണ്ട്​ കാരണങ്ങളാലെന്ന്​​ എയിംസ്​ ഡയറക്​ടർ

ന്യൂഡൽഹി: രാജ്യത്ത്​ കോവിഡ്​ അതിവേഗം പടർന്ന്​ പിടിക്കുകയാണ്​. ഒന്നാമ​ത്തതുമായി താരതമ്യം ചെയ്യ​ു​േമ്പാൾ രണ്ടാംതരംഗം കുറച്ചു കൂടി തീവ്രമാണ്​. ഇതിനിടെ രാജ്യത്ത്​ കോവിഡിന്‍റെ രണ്ടാം തരംഗത്തിന്​ രണ്ട്​ കാരണങ്ങളാണിടയാക്കിയതെന്ന പ്രസ്​താവനയുമായി രംഗത്തെത്തിയിരിക്കുകയാണ്​ എയിംസ്​ ഡയറക്​ടർ രൺദീപ്​ ഗുലേറിയ.

ജനങ്ങൾ കോവിഡ്​ പ്രോ​ട്ടോകോൾ മറന്നതും ജനിതകമാറ്റം സംഭവിച്ച വൈറസുമാണ്​ കോവിഡ്​ വ്യാപനത്തിനടയാക്കിയതെന്നാണ്​ രൺദീപ്​ ഗുലേറിയ പറയുന്നത്​. ജനുവരി-ഫെബ്രുവരി മാസങ്ങളിൽ ജനങ്ങൾ കോവിഡ്​ പ്രോ​ട്ടോകോൾ പൂർണമായും മറന്നു. വാക്​സിൻ എത്തിയതും രോഗികളുടെ എണ്ണം കുറഞ്ഞതുമായിരുന്നു ഇതിന്​ കാരണം. ഇത്​ രോഗ വ്യാപനത്തിനിടയാക്കിയിട്ടുണ്ട്​. ഇതിനൊപ്പം വൈറസിന്​ സംഭവിച്ച ജനിതകമാറ്റവും സ്ഥിതി രൂക്ഷമാക്കിയെന്നും അദ്ദേഹം പറഞ്ഞു.

രാഷ്​ട്രീയ പരിപാടികൾക്കും മതചടങ്ങുകൾക്കും വേണ്ടിയുള്ള ആൾക്കൂട്ടങ്ങളിൽ അദ്ദേഹം ആശങ്ക രേഖപ്പെടുത്തി. കോവിഡ്​ പടർന്നു പിടിക്കുന്ന സാഹചര്യത്തിൽ ഇത്തരം ആൾക്കൂട്ടങ്ങൾ പരമാവധി ഒഴിവാക്കണമെന്ന്​ ഗുലേറിയ ആവശ്യപ്പെട്ടു.