ബംഗാളിൽ കോൺഗ്രസ് -ഇടതു സഖ്യം തെരഞ്ഞെടുപ്പിനെ നേരിടാനൊരുങ്ങുന്നു

കൊൽക്കത്ത: പശ്ചിമ ബംഗാൾ നിയമസഭാ തെരഞ്ഞെടുപ്പിന് മുന്നോടിയായി ഈമാസം 23 മുതൽ കോൺഗ്രസ്, ഇടതു പാർട്ടികൾ സംയുക്തമായി സംസ്ഥാനത്ത് വിവിധ പരിപാടികൾ സംഘടിപ്പിക്കും. എല്ലാ ജില്ലകളിലെയും വിവിധ ബ്ലോക്കുകളിൽ പരിപാടി സംഘടിപ്പിക്കാൻ ചൊവ്വാഴ്ച നടന്ന കോൺഗ്രസ്-ഇടതു പാർട്ടി സഖ്യ യോഗം തീരുമാനിച്ചു.

സഖ്യത്തിന്‍റെ തെരഞ്ഞെടുപ്പ് പ്രവർത്തനങ്ങൾ യോഗത്തിൽ ആസൂത്രണം ചെയ്​തു. 'സഖ്യത്തിന്‍റെ ലക്ഷ്യം വ്യക്തമാണ്. തെരഞ്ഞെടുപ്പിന് മുമ്പ് ഇത് ബംഗാളിലെ എല്ലാ ബൂത്തുകളിലേക്കും താഴെ തട്ടിൽ എത്തിക്കും. ജനങ്ങൾ ആഗ്രഹിക്കുന്നത്പോലെ തൃണമൂലിൽനിന്നും ബി.ജെ.പിയിൽനിന്നും ബംഗാളിനെ രക്ഷിക്കും' -പശ്ചിമ ബംഗാൾ പ്രദേശ് കോൺഗ്രസ് കമ്മിറ്റി പ്രസ്താവനയിൽ പറഞ്ഞു.

നേരത്തേ കോൺഗ്രസിന്‍റെയും ഇടതുപക്ഷത്തിന്‍റെയും മുൻകൂട്ടി പ്രഖ്യാപിച്ച എല്ലാ പരിപാടികളും തുടരും. പൊതുമിനിമം പരിപാടി പ്രഖ്യാപിച്ച് സീറ്റ് ധാരണ അടക്കം നേരത്തേ തയ്യാറെടുപ്പുകൾ നടത്തി തെരഞ്ഞെടുപ്പിനെ നേരിടാനാണ് സഖ്യത്തിന്‍റെ തീരുമാനം.