ഹൈദരാബാദ്​ മൃഗശാലക്ക്​ പുറമെ, ജയ്​പുരിലെ സിംഹത്തിനും കോവിഡ്​

ജയ്​പുർ: രാജ്യത്ത്​ കോവിഡ്​ 19ന്‍റെ രണ്ടാം തരംഗം രൂക്ഷമായി തുടരുന്നതിനിടെ രോഗബാധ മൃഗങ്ങളിലേക്കും പടരുന്നു. ഹൈദരാബാദിലെ മൃഗശാലക്ക്​ പുറമെ ജയ്​പുർ മൃഗ​ശാലയിലെ സിംഹത്തിനും​ രോഗം സ്​ഥിരീകരിച്ചു​.

ജയ്​പുർ മൃഗശാലയിലെ ത്രിപുർ എന്ന സിംഹത്തിന്​ രോഗം സ്​ഥിരീകരിച്ചതായി ഇന്ത്യൻ വെറ്റിനറി റിസർച്ച്​ ഇൻസ്റ്റിറ്റ്യൂട്ട്​ (ഐ.വി.ആർ.ഐ) അധികൃതർ അറിയിച്ചു.

ത്രിപുരിന്‍റെ സാമ്പിളുകൾക്കൊപ്പം പരിശോധനക്ക്​ അയച്ച പുള്ളിപുലി, വെള്ളക്കടുവ, പെൺസിംഹം എന്നിവയുടെ സാമ്പിളുകളുടെ പരിശോധന ഫലത്തിൽ അവ്യക്തതയുള്ളതിനാൽ വീണ്ടും പരി​േശാധനക്ക്​ അയച്ചിരിക്കുകയാണ്​. 13 മൃഗങ്ങളുടെ സാമ്പിളുകളാണ്​ പരിശോധനക്ക്​ അയച്ചിരുന്നത്​. ഇതിൽ മൂന്ന്​ സിംഹവും മൂന്ന്​ കടുവയും ഒരു പുള്ളിപുലിയും ഉൾപ്പെടും.

അതേസമയം പഞ്ചാബിലെയും ഉത്തർപ്രദേശിലെയും മൃഗശാലകളിൽനിന്ന്​ ലഭിച്ച സാമ്പിളുകളുടെ പരിശോധന ഫലം നെഗറ്റീവാണെന്നും ഐ.വി.ആർ.ഐ ജോയിന്‍റ്​ ഡയറക്​ടർ കെ.പി. സിങ്​ പറഞ്ഞു.

മൃഗങ്ങളെ പരിപാലിക്കുന്ന രോഗലക്ഷണങ്ങളില്ലാത്ത മനുഷ്യരിൽനിന്നാകാം രോഗം മൃഗങ്ങളിലേക്ക്​ പകർന്നതെന്നും അദ്ദേഹം കൂട്ടിച്ചേർത്തു.

നേരത്തേ ഹൈദരാബാദ്​ മൃഗശാലയിലെ എട്ട്​ ഏഷ്യൻ സിംഹങ്ങൾക്ക്​ കോവിഡ്​ സ്​ഥിരീകരിച്ചിരുന്നു. തുടർന്ന്​ മൃഗശാല അടച്ചിടുകയും ജീവനക്കാർക്ക്​ ആവശ്യ​മായ മുൻകരുതലുകളും സ്വീകരിച്ചിരുന്നു. ഇന്ത്യയിൽ ആദ്യമായി മൃഗങ്ങൾക്ക്​ രോഗം സ്​ഥിരീകരിച്ചത്​ ഇവിടെയാണ്​. രോഗം സ്​ഥിരീകരിച്ച സിംഹങ്ങൾ സുഖം പ്രാപിച്ച്​ വരുന്നതായാണ്​ വിവരം.