കങ്കണക്ക്​ നഷ്​ടപരിഹാരം ഉദ്ധവ് താക്കറെ​ നൽകണമെന്ന്​ ബി.ജെ.പി

മുംബൈ: കങ്കണയുടെ കെട്ടിടം പൊളിച്ചതിൻെറ നഷ്​ടപരിഹാരം മഹാരാഷ്​ട്ര മുഖ്യമന്ത്രി ഉദ്ധവ്​ താക്കറെ നൽകണമെന്ന്​ ബി.ജെ.പി. ബോംബെ ഹൈകോടതിയിൽ നിന്ന്​ കങ്കണക്ക്​ അനുകൂല വിധിയുണ്ടായതോടെയാണ്​ ഉദ്ധവിനെതിരെ രൂക്ഷ വിമർശനവുമായി ബി.ജെ.പി രംഗത്തെത്തിയത്​.

ബി.ജെ.പി നേതാവ്​ അതുൽ ഭക്​തകൽകറാണ്​ ഉദ്ധവിനെ വിമർശിച്ച്​ രംഗത്തെത്തിയത്​. മുഖ്യമന്ത്രിയുടെ നിർദേശപ്രകാരമാണ്​ ബി.എം.സി കങ്കണയുടെ വീട്​ പൊളിച്ചത്​. മുഖ്യമന്ത്രി കങ്കണയുടെ വീട്​ ​പൊളിച്ചതിൻെറ ധാർമിക ഉത്തരവാദിത്തം ഏറ്റെടുക്കണം. ഉദ്ധവ്​ താക്കറെ രാജിവെക്കണമെന്നും ബി.ജെ.പി നേതാക്കൾ ആവശ്യപ്പെട്ടു.

കങ്കണ റണാവത്തിൻെറ വീട്​ പൊളിക്കരുതെന്ന് ബോംബെ​ ഹൈകോടതി ഇന്ന്​ ഉത്തരവിട്ടിരുന്നു. വീട്​ പൊളിക്കാൻ ബ്രിഹാൻ മുംബൈ കോർപറേഷൻ നൽകിയ നോട്ടീസ്​ ഹൈകോടതി റദ്ദാക്കിയിരുന്നു. കങ്കണയുടെ വീട്ടിലെ നിർമാണം ക്രമപ്പെടുത്തണമെന്നും​ ​ കോടതി നിർദേശിച്ചിരുന്നു.