പാക്​ ആക്രമണം: എട്ടുമാസം പ്രായമുള്ള കുഞ്ഞ്​ മരിച്ചു; പ്രതിഷേധം ശക്​തം

ന്യൂഡൽഹി: കശ്​മീരിലെ ഭീംബെർ മേഖലയിൽ കഴിഞ്ഞ ദിവസം പാകിസ്​താൻ പ്രകാപനമില്ലാതെ നടത്തിയ ഷെല്ലാക്രമണത്തിൽ എട്ടുമാസം മാത്രം പ്രായമുള്ള കുഞ്ഞ്​ മരിച്ചതിൽ ശക്​തമായ പ്രതിഷേധവുമായി ഇന്ത്യ. ഇതേതുടർന്ന്​ പാകിസ്​താൻ ഡെപ്യുട്ടി ഹൈകമ്മീഷണർ സയിദ്​ ഹൈദർ ഷായെ ഇന്ത്യ വിളിച്ചു വരുത്തി. 

പാകിസ്​താൻ മനഃപൂർവം നിഷ്​കളങ്കരായ ഗ്രാമീണരെ ലക്ഷ്യം വെക്കുകയാണെന്ന്​ വിദേശകാര്യമന്ത്രാലയം ആരോപിച്ചു. അതിർത്തിയിൽ നിന്ന്​ മാറിത്താമസിച്ചിട്ടും ജനങ്ങൾക്ക്​ നേരെയുള്ള ആക്രമണത്തിൽ ശക്​തമായ പ്രതിഷേധം രേഖപ്പെടുത്തുന്നുവെന്നും മന്ത്രാലയം പ്രസ്​താവനയിൽ വ്യക്​തമാക്കി. 

സാധാരണക്കാരായ ജനങ്ങളെയും കുട്ടികളെയും ലക്ഷ്യം വെക്കുന്ന്​ മനുഷ്യത്വ രഹിതവും സൈനിക പെരുമാറ്റത്തിന്​ വിരുദ്ധവുമാണ്​. വിഷയത്തിൽ പാക്​ അധികൃതർ അന്വേഷണം നടത്തി സൈന്യത്തെ ഇൗ നീച കൃത്യങ്ങളിൽ നിന്ന്​ തടയണമെന്നും ഇന്ത്യ ആവശ്യപ്പെട്ടു. 

മെയ്​21ന്​ പാകിസ്​താൻ നടത്തിയ വെടിനിർത്തൽ കരാർ ലംഘനത്തിലാണ്​ എട്ടുമാസം പ്രായമുള്ള കുഞ്ഞ്​ മരിച്ചത്​.