വളർത്തുനായയെ വേലക്കാരൻ കൊലപ്പെടുത്തിയെന്ന പരാതിയുമായി ബോളിവുഡ്​ നടി; മനുഷ്യരുടെ കേസ്​ തീർന്നിട്ടാവാമെന്ന്​ ഫോറൻസിക്​

പുണെ: വളർത്തുനായയെ വീട്ടുജോലിക്കാരൻ കൊലപ്പെടുത്തിയെന്ന പരാതിയുമായി നടി അയേഷ ജുൽക. ലോണേവാലയിലെ വീട്ടിൽ വളർത്തുനായ റോക്കിയെ ജോലിക്കാരനായ രാം അന്ദേര കൊലപ്പെടുത്തിയെന്നാണ്​ നടിയും ആക്​ടിവിസ്റ്റുമായ ജുൽക്കയുടെ പരാതി. ലോണേവാലയിലെ തെരുവിൽ നിന്നും ജുൽക എടുത്ത്​ വളർത്തിയ നായാണ്​ കൊല്ലപ്പെട്ടത്​.

റോക്കിക്കൊപ്പം റിഗ്ഗലി എന്ന നായ​യേയും ജുൽക എടുത്തു വളർത്തിയിരുന്നു. സെപ്​തംബർ 13നാണ്​ നായ ചത്തുവെന്ന​ ഫോൺകോൾ മുംബൈയിലുള്ള ജുൽക്കക്ക്​ ലഭിക്കുന്നത്​. വീട്ടിലെ വാട്ടർ ടാങ്കിൽ മുങ്ങി മരിച്ചുവെന്നായിരുന്നു വീട്ടിലെ വേലക്കാരൻ പറഞ്ഞത്​. എന്നാൽ, വീട്ടിലെ ടാങ്കിന്​ വായ്​വട്ടം കുറവായിരുന്നു കൂടാതെ നായയുടെ ശരീരത്തിൽ പരിക്കുകളുമുണ്ടായിരുന്നു. ഇതോടെ നായയുടെ മരണം കൊലപാതകമാണെന്ന സംശയം ശക്​തമായി. തുടർന്ന്​ മുംബൈയിലേക്കുള്ള യാത്രമധ്യ ലോണവാലയിലേക്ക്​ മടങ്ങിയ അയേഷ സംസ്​കരിച്ച മൃതദേഹം പുറത്തെടുത്ത്​ പോസ്റ്റ്​മോർട്ടം നടത്തിക്കുകയും ചെയ്​തു. റിപ്പോർട്ടിൽ ശ്വാസംമുട്ടിയാണ്​ മരണമെന്നും നായ മുങ്ങിമരിക്കാനുള്ള സാധ്യതകൾ കുറവാണെന്നും പരാമർശിച്ചതോടെ ജുൽക ലോണേവാല പൊലീസ്​ സ്​റ്റേഷനിൽ പരാതി നൽകി.

പൊലീസ്​ അന്വേഷണത്തിന്‍റെ അടിസ്ഥാനത്തിൽ കേസിൽ കുറ്റപത്രം തയാറാണെന്ന്​ പൊലീസ്​ അറിയിച്ചു​. വൈകാതെ കുറ്റപത്രം കോടതിയിൽ സമർപ്പിക്കും. എങ്കിലും ഫോറൻസിക്​ റിപ്പോർട്ട്​ ഉൾപ്പടെയുള്ളവ ലഭിക്കാത്തതിനാൽ കേസിന്‍റെ വിചാരണ നീണ്ടു പോവുകയാണെന്ന്​​ ജുൽക പറയുന്നു. ഫോറൻസിക്​ ഡിപ്പാർട്ട്​മെന്‍റിൽ അന്വേഷിച്ചപ്പോൾ മനുഷ്യരുടെ കേസുകൾ ബാക്കിയുണ്ടെന്നും അതുകഴിഞ്ഞിട്ട്​ മതി ഇതെന്നുമുള്ള മറുപടിയാണ്​ ലഭിച്ചതെന്ന്​ ജുൽക പറഞ്ഞു. അതേസമയം, ഇക്കാര്യത്തിൽ പ്രതികരണത്തിന്​ ഫോറൻസിക്​ ഡിപ്പാർട്ട്​മെന്‍റ്​ തയാറായിട്ടില്ല.