വിവാഹ വാഗ്​ദാനം നൽകി പീഡിപ്പിച്ചതായി നടിയുടെ പരാതി; തമിഴ്​നാട്​ മുൻ മന്ത്രി മണികണ്​ഠൻ ഒളിവിൽ

ചെന്നൈ: വിവാഹ വാഗ്​ദാനം നൽകി പീഡിപ്പിച്ചെന്ന നടിയുടെ പരാതിക്ക്​ പിന്നാലെ തമിഴ്​നാട്ടിലെ മുൻ മന്ത്രി ഒളിവിൽ പോയി. അഡയാർ പൊലീസ്​ സ്​റ്റേഷനിലായിരുന്നു നടി തമിഴ്​നാട്ടിലെ മുൻ ഐ.ടി മന്ത്രിയായിരുന്ന എ. മണികണ്​ഠനെതിരെ പരാതി നൽകിയിരുന്നത്​.

മണിക്​ഠനുമായി അഞ്ച്​ വർഷമായി താൻ അടുപ്പത്തിലായിരുന്നുവെന്നാണ്​ 37കാരിയായ നടി പരാതിയിൽ പറയുന്നത്​. വിവാഹിതനായ ഇയാൾ വിവാഹ വാഗ്​ദാനം നൽകി പീഡിപ്പിക്കുകയായിരുന്നു. ഇക്കാലയളവിൽ പരാതിക്കാരി മൂന്ന്​ തവണ ഗർഭിണിയായെങ്കിലും മണികണ്​ഠൻ നിർബന്ധിപ്പിച്ച്​ ഗർഭം അലസിപ്പിച്ചു. വിവാഹത്തിന് ശേഷം മതി കുട്ടികൾ എന്നായിരുന്നു അയാൾ പറഞ്ഞത്​.

എന്നാല്‍ പിന്നീട് ഇയാൾ ബന്ധത്തില്‍ നിന്നും ഉൾവലിഞ്ഞു. ഇ​രുവരും തമ്മിലുള്ള ബന്ധം തെളിയിക്കുന്ന ചിത്രങ്ങൾ നടി പരാതിക്കൊപ്പം സമർപ്പിച്ചിട്ടുണ്ട്​. ആ​ദ്യം ആരോപണങ്ങൾ നിഷേധിച്ച മന്ത്രി തനിക്ക്​ പരാതിക്കാരിയെ അറിയില്ലെന്ന്​ പറഞ്ഞിരുന്നു. പരാതി ലഭിച്ചതിന്​ പിന്നാലെ പൊലീസ്​ മുൻ മന്ത്രിയെ തേടി രാമനാഥപുരം ജില്ലയിലെത്തിയെങ്കിലും ഇയാൾ മുങ്ങിയിരുന്നു.

പൊലീസിൽ പരാതിപ്പെട്ടാൽ സ്വകാര്യ ചിത്രങ്ങൾ സമൂഹ മാധ്യമങ്ങളിൽ പങ്കുവെക്കുമെന്ന്​ ഇയാൾ ഭീഷണിപ്പെടുത്തിയതായും നടി പരാതിയിൽ പറയുന്നു. വാടകക്കൊലയാളികളെ വെച്ച് തന്നെയും കുടുംബത്തെയും വകവരുത്തുമെന്നും ഇയാൾ​ ഭീഷണി മുഴക്കി.

2016ൽ രാമനാഥ പുരത്ത്​ നിന്നാണ്​ മണികണ്​ഠൻ നിയമസഭയിലെത്തിയത്​. 2019 വരെ അദ്ദേഹം തമിഴ്​നാട്ടിലെ ഐ.ടി മന്ത്രിയായിരുന്നു. മുൻ മുഖ്യമന്ത്രി എടപ്പാടി പളനിസ്വാമിക്കെതിരെ കലാപക്കൊടി ഉയർത്തിയ ടി.ടി.വി ദിനകരൻ പക്ഷത്തെ 18 എം.​എൽ.എമാരിൽ ഒരാളായിരുന്നു മണികണ്​ഠൻ. സംഭവത്തോടെ​ 2019ൽ മന്ത്രി സ്​ഥാനം നഷ്​ടമായിരുന്നു.