മായാവതിക്കെതിരായ 'തമാശ'; നടൻ രൺദീപ്​ ഹൂഡയെ യു.എൻ അംബാസഡർ സ്​ഥാനത്തുനിന്ന്​ നീക്കി

ന്യൂഡൽഹി: ഉത്തർപ്രദേശ്​ മുൻ മുഖ്യമന്ത്രിയും ബഹുജൻ സമാജ്​ പാർട്ടി അധ്യക്ഷയുമായ മായാവതിക്കെതിരെ ലൈംഗിക ചുവയുള്ളതും ജാതി പറഞ്ഞ് അധിക്ഷേിക്കുന്നതുമായ 'തമാശപ്രയോഗം' നടത്തിയ ബോളിവുഡ് നടൻ രൺദീപ് ഹൂഡയെ ദേശാടന ജീവികളുടെ സംരക്ഷണം സംബന്ധിച്ച പ്രവർത്തനങ്ങളുടെ ബ്രാൻഡ്​ അംബാസഡർ പദവിയിൽ നിന്ന്​ ഐക്യരാഷ്​ട്ര സഭ നീക്കി. യു.എന്നിന്‍റെ പരിസ്​ഥിതിസംരക്ഷണ മുന്നേറ്റമായ കൺവെൻഷൻ ഫൊർ ദി കൺസർവേഷൻ ഓഫ്​ മൈഗ്രേറ്ററി സ്​പീഷീസ്​ ഓഫ്​ വൈൽഡ്​ ആനിമൽസിന്‍റെ​ (സി.എം.എസ്​) അംബാസഡർ പദവിയിൽ നിന്നാണ്​ രൺദീപ്​ ഹൂഡയെ നീക്കിയത്​.

മായാവതിക്കെതിരെ ഒമ്പത്​ കൊല്ലം മുമ്പ്​ ഹൂഡ നടത്തിയ പരാമർശങ്ങൾ ഇപ്പോൾ സോഷ്യൽ മീഡിയയിൽ വൈറലാകുകയും വിമർശനങ്ങൾ രൂക്ഷമാകുകയും ചെയ്​ത സാഹചര്യത്തിലാണ്​ നടപടി. 2012ൽ നടന്ന പൊതുപരിപാടിയിലാണ് ഹൂഡ വിവാദമായ അഭിപ്രായ പ്രകടനം നടത്തിയത്​. 43 സെക്കന്‍റ്​ ദൈർഘ്യമുള്ള വിഡിയോയിൽ താരം മായാവതിയെക്കുറിച്ച് ജാതി അധിക്ഷേപം നടത്തുന്നതും ലൈംഗിക ചുവയുള്ള തമാശകൾ പറയുന്നതും അത് കേട്ട് ആസ്വദിക്കുന്ന സദസ്സിനോടൊപ്പം പൊട്ടിച്ചിരിക്കുന്നതും കാണാം. ഈ വീഡിയോയിലെ താരത്ത​ിന്‍റെ കമന്‍റുകൾ 'കുറ്റകരമാണെന്ന്​' കണ്ടെത്തിയതിനാലാണ്​ അംബാസഡർ പദവിയിൽ നിന്ന്​ അദ്ദേഹത്തെ മാറ്റുന്നതെന്ന് ഔദ്യോഗിക​ വെബസൈറ്റിൽ ഈ തീരുമാനം അറിയിച്ച്​ പ്രസിദ്ധീകരിച്ച പ്രസ്​താവനയിൽ സി.എം.എസ്​ ചൂണ്ടിക്കാട്ടി. രൺദീപ്​ ഹൂഡയുടെ പരാമർശങ്ങൾ സി.എം.എസ്​ സെ​ക്ര​േട്ടറിയറ്റിന്‍റെയോ യു.എന്നിന്‍റെയോ മൂല്യങ്ങൾ ഉയത്തിപ്പിടിക്കുന്നതല്ലെന്നും അന്തസ്സിന്​ നിരക്കുന്നതല്ലെന്നും പ്രസ്​താവനയിൽ പറയുന്നു. 2020 ഫെബ്രുവരിയിലാണ്​ മൂന്നുവർഷത്തേക്ക്​ ഹൂഡയെ അംബസാഡർ പദവിയിലേക്ക്​ നിയോഗിച്ചത്​.

മായാവതിക്കെതി​രായ പരാമർശങ്ങളുടെ പേരിൽ 44കാരനായ താരത്തിനെതിരെ സമൂഹ മാധ്യമങ്ങൾക്കകത്തും പുറത്തും വൻ പ്രതിഷേധമാണുയരുന്നത്​. #ArrestRandeepHooda എന്ന ഹാഷ്​ടാഗ്​ വെള്ളിയാഴ്ച ട്വിറ്ററിൽ ​െ​​ട്രൻഡിങ്​ ആയിരുന്നു. നിരവധി പേരാണ്​ താരത്തിനെതിരെ നിയമനടപടി സ്വീകരിക്കണമെന്ന ആവശ്യവുമായി രംഗത്തെത്തിയിരിക്കുന്നത്​.