കർഷകരെ ഖലിസ്​താൻ തീവ്രവാദികളെന്നു വിളിച്ച നടി കങ്കണയുടെ കാർ പഞ്ചാബിൽ തടഞ്ഞു

ന്യൂഡൽഹി: കേന്ദ്രസർക്കാരിന്‍റെ വിവാദ കാർഷിക നിയമങ്ങൾക്കെതിരെ പ്രക്ഷോഭം നടത്തിയ കർഷകരെ ഖലിസ്​താൻ തീവ്രവാദികൾ എന്ന്​ വിളിച്ച നടി കങ്കണ റണാവത്തിന്‍റെ കാർ കർഷകർ പഞ്ചാബിൽ തടഞ്ഞു. പ്രക്ഷോഭത്തിൽ അണിനിരന്ന കർഷകരോട്​ കങ്കണ പ്രസ്​താവനക്ക്​ മാപ്പ്​ പറയണം എന്ന്​ ആവശ്യ​െപ്പട്ടാണ്​ കർഷകർ കാർ തടഞ്ഞത്​.

പഞ്ചാബിലെ കിരാത്പൂർ സാഹിബിൽ വെള്ളിയാഴ്ചയാണ്​ സംഭവം. ബി.ജെ.പിയുടെ കടുത്ത അനുയായ റണാവത്ത്​ , ഒരു വർഷത്തിലേറെയായി ഡൽഹിയുടെ അതിർത്തിയിൽ തമ്പടിച്ചിരിക്കുന്ന ആയിരക്കണക്കിന് കർഷകരെ തീവ്രവാദികളും ഖാലിസ്ഥാനികളും സാമൂഹ്യ വിരുദ്ധരും എന്ന് നിരന്തരം വിളിച്ച് ആക്ഷേപിച്ചു വരികയായിരുന്നു.

ഇതിനെതിരെയാണ്​ അംഗരക്ഷകരുമായി വരുംവഴി പ്രതിഷേധക്കാർ പതാകകൾ വീശിയും മുദ്രാവാക്യം വിളിച്ചും അവരുടെ കാർ തടഞ്ഞത്​. സംഭവം സംബന്ധിച്ച്​ കങ്കണ തന്നെ ഇൻസ്റ്റാഗ്രാം സ്റ്റോറിയിൽ വിവരം പങ്കുവെച്ചു. 'ഇവിടെ ഒരു ജനക്കൂട്ടം എന്നെ വളഞ്ഞിരിക്കുന്നു. അവർ എന്നെ അധിക്ഷേപിക്കുകയും കൊല്ലുമെന്ന് ഭീഷണിപ്പെടുത്തുകയും ചെയ്യുന്നു'-അവർ ഇൻസ്റ്റാഗ്രാം വീഡിയോയിൽ ആരോപിച്ചു. 'ഈ ആൾക്കൂട്ടം പൊതുസ്ഥലത്ത് തല്ലിക്കൊല്ലും. എനിക്ക് സുരക്ഷ ഇല്ലെങ്കിൽ എന്തും സംഭവിക്കും.

ഇവിടെ സ്ഥിതി ദയനീയമാണ്. ഞാൻ ഒരു രാഷ്ട്രീയക്കാരിയാണോ? എന്താണ് ഈ പെരുമാറ്റം' -അവർ പറഞ്ഞു. കേന്ദ്രത്തിന്‍റെ വിവാദ പൗരത്വ നിയമത്തിനെതിരെ കഴിഞ്ഞ വർഷം ഡൽഹിയിലെ ഷഹീൻ ബാഗിൽ പ്രകടനം നടത്തിയ പ്രതിഷേധക്കാരെ ലക്ഷ്യമിട്ടും വിഷം വമിപ്പിക്കുന്ന പരാമർശങ്ങൾ നടത്തി കങ്കണ ശ്രദ്ധ നേടിയിരുന്നു.