ഒരുവർഷം 11 ജാമ്യാപേക്ഷ; വഞ്ചനാ കേസ്​ പ്രതിക്ക്​ 25,000 രൂപ പിഴയിട്ട്​ കോടതി

ന്യൂഡൽഹി: ഒരു വർഷം 11 ജാമ്യഹരജി സമർപ്പിച്ചയാൾക്ക്​ പിഴ ശിക്ഷ വിധിച്ച്​ ഡൽഹി കോടതി. അത്തരം 'നിസാരമായ' ഹർജികൾ കെട്ടിക്കിടക്കുന്നത് കാരണം കോടതികളുടെ വിലയേറിയ സമയം പാഴാകുന്നതായി ചൂണ്ടിക്കാട്ടിയാണ്​ നടപടി.

സാഹചര്യങ്ങളിൽ ഒരു മാറ്റവുമില്ലാതെയാണ്​ പതിനൊന്നാം തവണയും ജാമ്യാപേക്ഷ സമർപ്പിച്ചതെന്ന്​ ചൂണ്ടിക്കാട്ടിയാണ് വഞ്ചന, ഗൂഢാലോചന കേസ്​ പ്രതിക്ക് അഡീഷനൽ സെഷൻസ് ജഡ്ജി രവീന്ദർ ബേദി 25,000 രൂപ പിഴ ചുമത്തിയത്​.

പ്രതിയുടെ പത്താമത്തെ ജാമ്യാപേക്ഷ 2021 നവംബർ 29ന് തള്ളിയിരുന്നു. ഇടക്കാല ജാമ്യം തേടിയുള്ള ആറാമത്തെ ഹർജി തള്ളിക്കളഞ്ഞതായി ബേദി പറഞ്ഞു. പ്രതി 2020 നവംബർ 27 മുതൽ ജുഡീഷ്യൽ കസ്റ്റഡിയിലാണ്.