ഭാര്യയെ ഭർത്താവ്​ മർദിക്കുന്നത്​ കേരളത്തിലെ​ 52 ശതമാനം സ്​ത്രീകളും പിന്തുണക്കുന്നെന്ന്​ സർവേ

ന്യൂഡൽഹി: കേരളത്തിൽ ഭാര്യമാരെ ഭർത്താക്കൻമാർ മർദിക്കുന്നതിനെ 52 ശതമാനം സ്​ത്രീകളും പിന്തുണക്കുന്നതായി ദേ​ശീ​യ കു​ടും​ബാ​രോ​ഗ്യ സ​ർ​വേ​. മൂന്ന്​ സംസ്​ഥാനങ്ങളിൽ ഇത്​ ഏകദേശം 80 ശതമാനമാണ്​.

തെലങ്കാനയിലും ആന്ധ്രാപ്രദേശിലും 84 ശതമാനം സ്​ത്രീകളും പുരുഷൻമാർ ഭാര്യയെ മർദിക്കുന്നതിനെ ന്യായീകരിക്കുന്നവരാണ്​. കർണാടക (77), മണിപ്പൂർ (66), കേരളം (52), ജമ്മു കശ്മീർ (49), മഹാരാഷ്ട്ര (44), പശ്ചിമ ബംഗാൾ (42) എന്നിങ്ങനെയാണ് പട്ടികയിൽ മുന്നിലുള്ള മറ്റു സംസ്​ഥാനങ്ങൾ.

'നിങ്ങളുടെ അഭിപ്രായത്തിൽ, ഒരു ഭർത്താവ് ഭാര്യയെ ഇടിക്കുകയോ തല്ലുകയോ ചെയ്യുന്നത് ന്യായീകരിക്കുമോ' എന്നതായിരുന്നു സർവേയിലെ ചോദ്യം. സർവേ നടത്തിയ 18ൽ 14 സംസ്ഥാനങ്ങളിൽനിന്നും കേന്ദ്രഭരണ പ്രദേശങ്ങളിൽ നിന്നുമുള്ള 30 ശതമാനത്തിലധികം സ്ത്രീകൾ അതെ എന്ന്​ ഉത്തരം നൽകി.

വിശ്വാസ്യത നഷ്​ടപ്പെടൽ, മരുമക്കളെ അനാദരിക്കൽ, ഭർത്താവിനോട്​ തർക്കിക്കൽ, ലൈംഗിക ബന്ധത്തിൽ ഏർപ്പെടാൻ വിസമ്മതിക്കൽ, ഭർത്താവിനോട്​ പറയാതെ പുറത്തുപോകൽ, കുട്ടികളെയും വീടിനെയും അവഗണിക്കൽ, നല്ല ഭക്ഷണം പാകം ചെയ്യാതിരിക്കൽ തുടങ്ങിയ കാരണങ്ങളാണ്​ മർദിക്കാനുള്ള പ്രധാന കാരണമായി സർവേ ചൂണ്ടിക്കാട്ടുന്നത്​.

വീടിനെയോ കുട്ടികളെയോ അവഗണിക്കുന്നതും മരുമക്കളോട് അനാദരവ് കാണിക്കുന്നതുമാണ് മർദനത്തെ ന്യായീകരിക്കാൻ സർവേയിൽ പ്രതികരിച്ചവരിൽ കൂടുതലായും പറഞ്ഞ കാരണം. മരുമക്കളോടുള്ള അനാദരവാണ്​ ഹിമാചൽ പ്രദേശ്, കേരളം, മണിപ്പൂർ, ഗുജറാത്ത്, നാഗാലാൻഡ്, ഗോവ, ബിഹാർ, കർണാടക, അസം, മഹാരാഷ്ട്ര, തെലങ്കാന, പശ്ചിമ ബംഗാൾ എന്നീ 13 സംസ്ഥാനങ്ങളിലെയും സ്ത്രീകൾ പിന്തുണക്കുന്നതിന്‍റെ പ്രധാന കാരണമായി പറയുന്നത്​.

ഭർത്താക്കന്മാർ മർദിക്കുന്നതിനെ ന്യായീകരിക്കുന്ന ഏറ്റവും കുറഞ്ഞ ശതമാനം സ്ത്രീകളുള്ളത്​ ഹിമാചൽ പ്രദേശിലാണ് (14.8). ഭാര്യയെ മർദിക്കുന്നത്​ കർണാടകയിൽ നിന്നുള്ള പുരുഷൻമാരിൽ 81.9 ശതമാനം പിന്തുണച്ചപ്പോൾ ഹിമാചൽ പ്രദേശിലത്​ 14.2 ശതമാനമാണ്​.