നൊബേൽ വേദിയിൽ അഭിജിത്തും എസ്തറും എത്തിയത് ഇന്ത്യൻ വേഷത്തിൽ
text_fieldsഒാസ് ലോ: സാമ്പത്തിക ശാസ്ത്ര നൊേബൽ പുരസ്കാരം സ്വീകരിക്കാൻ ജേതാക്കളായ അഭിജിത്ത് ബാനർജിയും ഭാര്യ എസ്തർ ഡഫ്ലോയും എത്തിയത് വേറിട്ട വസ്ത്രത്തിൽ. അഭിജിത്ത് ഇന്ത്യൻ പരമ്പരാഗത വസ്ത്രമായ ധോത്തിയും ജുബ്ബയും ഭാര്യ എസ്തർ നീല സാരിയും ധരിച്ചാണ് ഒാസ് ലോയിൽ നടന്ന ചടങ്ങിൽ പുരസ്കാരം ഏറ്റുവാങ്ങിയത്. അതേസമയം, പുരസ്കാരം പങ്കിട്ട മൂന്നാമനായ മൈക്കൽ ക്രെമർ സ്യൂട്ട് ധരിച്ചാണ് ചടങ്ങിനെത്തിയത്.
2019ലെ സാമ്പത്തിക ശാസ്ത്ര നൊേബൽ പുരസ്കാരത്തിന് അഭിജിത്ത് ബാനർജി, എസ്തർ ഡഫ്ലോ, മൈക്കൽ ക്രെമർ എന്നിവരാണ് അർഹരായത്. ആഗോളതലത്തിൽ ദാരിദ്ര്യം ഇല്ലാതാക്കാനുള്ള പുതുപരീക്ഷണ സമീപനമാണ് ഇവർക്ക് നൊബേൽ നേടിക്കൊടുത്തത്. അഭിജിത്തും എസ്തറും അമേരിക്കയിലെ മസാചൂസറ്റ്സ് ഇൻസ്റ്റിറ്റ്യൂട്ട്സ് ഓഫ് ടെക്നോളജിയിലും (എം.ഐ.ടി) മൈക്കൽ ക്രെമർ ഹാർവഡ് സർവകലാശാലയിലും പ്രഫസർമാരാണ്.
Watch Abhijit Banerjee, Esther Duflo and Michael Kremer receive their medals and diplomas at the #NobelPrize award ceremony today. Congratulations!
— The Nobel Prize (@NobelPrize) December 10, 2019
They were awarded the 2019 Prize in Economic Sciences “for their experimental approach to alleviating global poverty.” pic.twitter.com/c3ltP7EXcF
58കാരനായ അഭിജിത്ത് ബാനർജി മുംബൈയിലാണ് ജനിച്ചത്. 1988ൽ ഹാർവഡ് സർവകലാശാലയിൽ നിന്ന് പിഎച്ച്.ഡിയെടുത്തു. കൽക്കത്ത പ്രസിഡൻസി സർവകലാശാല, ഡൽഹി ജവഹർലാൽ നെഹ്റു സർവകലാശാല എന്നിവിടങ്ങളിലായിരുന്നു വിദ്യാഭ്യാസം. അമേരിക്കൻ പൗരത്വമുള്ള ഫ്രഞ്ചുകാരിയായ എസ്തറിനും സെന്തിൽ മുല്ലൈനാഥനുമൊപ്പം ചേർന്ന് അഭിജിത്ത് 2003ൽ ‘അബ്ദുൽ ലത്തീഫ് ജമീൽ പോവർട്ടി ആക്ഷൻ ലാബ്’ സ്ഥാപിച്ചു.
നിരവധി ലേഖനങ്ങളും ‘പുവർ ഇക്കണോമിക്സ്’ ഉൾപ്പെടെ നാലു പുസ്തകങ്ങളും അദ്ദേഹം എഴുതിയിട്ടുണ്ട്. ഈ പുസ്തകങ്ങൾ 17 ഭാഷകളിൽ പ്രസിദ്ധീകരിച്ചു. യു.എൻ സെക്രട്ടറി ജനറലിന്റെ ഉന്നത സമിതിയിലും അംഗമായിരുന്നു ഇദ്ദേഹം. അമർത്യസെന്നാണ് സാമ്പത്തിക ശാസ്ത്ര നൊേബൽ നേടിയ ആദ്യ ഇന്ത്യക്കാരൻ.
എസ്തർ ഡഫ്ലോക്ക് നിരവധി അന്താരാഷ്ട്ര പുരസ്കാരങ്ങൾ ലഭിച്ചിട്ടുണ്ട്. സാമ്പത്തികശാസ്ത്ര നൊബേൽ നേടുന്ന രണ്ടാമത്തെ വനിതയും ഏറ്റവും പ്രായംകുറഞ്ഞ വ്യക്തിയുമാണ് 47കാരിയായ എസ്തർ. അഭിജിത്തും എസ്തറും ചേർന്നാണ് പുവർ ഇക്കണോമിക്സ് എന്ന പുസ്തകം രചിച്ചത്.
കഴിഞ്ഞ ലോക്സഭ തെരഞ്ഞെടുപ്പിൽ കോൺഗ്രസ് പ്രകടനപത്രികയിൽ വാഗ്ദാനം ചെയ്ത ‘ന്യായ്’ പദ്ധതിയുടെ പ്രധാന ഉപദേശകരിൽ അഭിജിത്ത് ബാനർജിയുമുണ്ടായിരുന്നു. ദരിദ്രർക്ക് മിനിമം വേതനം ഉറപ്പുവരുത്തുന്നതാണ് പദ്ധതി. നരേന്ദ്ര മോദി സർക്കാറിെൻറ നോട്ടുനിരോധനത്തിന്റെ കടുത്ത വിമർശകനായിരുന്നു ഇദ്ദേഹം.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.