സോനിപത് ബോംബ് സ്ഫോടനം: അബ്ദുൾ കരീം തുണ്ടക്ക് ജീവപര്യന്തം

ന്യൂഡൽഹി: 1996ലെ സോനിപത് ബോംബ് സ്ഫോടനക്കേസുകളിൽ ലഷ്കർ ഇ ത്വയ്യിബ ഭീകരൻ അബ്ദുൾ കരീം തുണ്ടക്ക് കോടതി ജീവപര്യന്തം ശിക്ഷ വിധിച്ചു. കൂടാതെ 50,000 രൂപ പിഴയും തുണ്ട ഒടുക്കണം. ഇന്നലെ തുണ്ടയെ കുറ്റക്കാരനായി കോടതി കണ്ടെത്തിയിരുന്നു.

1996 ൽ സോനിപതിൽ നടന്ന ഇരട്ട സ്ഫോടനത്തിൽ 15 പേർക്കു പരുക്കേറ്റിരുന്നു. സിനിമാ തിയേറ്ററിലും മി‍ഠായിക്കടയിലുമായാണ് സ്ഫോടനങ്ങൾ നടന്നത്. 2013 ഓഗസ്റ്റ് 16 ന് ഇന്ത്യ-നേപ്പാൾ അതിർത്തിയിൽ ബൻബാസയിൽ നിന്നാണ് തുണ്ടയെ അറസ്റ്റ് ചെയ്തത്. ഇന്ത്യയിൽ നടന്ന നിരവധി സ്ഫോടനങ്ങളിലും ഇയാൾക്ക് പങ്കുണ്ടെന്ന് സംശയിക്കപ്പെടുന്നു.