യു.പിയിൽ കോവിഡ് രോഗിയായ അമ്മയെ വഴിയില്‍ ഉപേക്ഷിച്ച് മക്കൾ, പൊലീസ്​ ആശുപത്രിയിലെത്തിച്ചെങ്കിലും മരിച്ചു

കാൻപുർ: കോവിഡ് ബാധിതയായ അമ്മയെ മകൻ വഴിയിൽ ഉപേക്ഷിച്ചു. ഏറ്റെടുക്കാൻ മകളും തയാറായില്ല. ഒടുവിൽ, നാട്ടുകാർ വിവരമറിയിച്ചതനുസരിച്ച്​ പൊലീസെത്തി ആശുപത്രിയിലാക്കിയെങ്കിലും ചികിത്സയിലിരിക്കെ ആ അമ്മ മരണത്തിന്​ കീഴടങ്ങി. ഉത്തർപ്രദേശിലെ കാൻപുരിലാണ് ദാരുണമായ സംഭവം. അമ്മയെ ഉപേക്ഷിച്ചതിന് മകൻ വിശാലിനെതിരെ കേസെടുത്തതായി പൊലീസ് അറിയിച്ചു.

കാൻപുർ ക​േന്‍റാണ്‍മെന്‍റിലാണ്​ വിശാലും അമ്മയും താമസിച്ചിരുന്നത്​. കോവിഡ് പോസിറ്റീവായതിനെ തുടർന്ന് അമ്മയ്ക്ക് കടുത്ത ശ്വാസതടസ്സം അനുഭവപ്പെട്ടിരുന്നു. ആരോഗ്യസ്ഥിതി വഷളായതോടെ വിശാൽ അമ്മയുമായി ചക്കേരിയിലെ തഡ്​ ബാഗിയ പ്രദേശത്തെത്തി. അവിടെയുള്ള സഹോദരിയുടെ വീടിന് മുന്നിലുള്ള റോഡിന് സമീപം അമ്മയെ ഉപേക്ഷിച്ച് വിശാൽ കടന്നുകളയുകയായിരുന്നു.

ഗുരുതരാവസ്ഥയിലായ അമ്മയുടെ ഉത്തരവാദിത്തം ഏറ്റെടുക്കാൻ മകളും തയാറായില്ല. അമ്മയെ വീട്ടിലേക്ക് പ്രവേശിപ്പിക്കാതെ മകളും വഴിയരികിൽ തന്നെ കിടത്തി. സംഭവം ശ്രദ്ധയിൽപ്പെട്ട നാട്ടുകാർ ഈ അമ്മയുടെ ദൃശ്യങ്ങൾ ചിത്രീകരിച്ച് സമൂഹ മാധ്യമങ്ങളിൽ പോസ്റ്റ് ചെയ്തു. ഒരു പുതപ്പിൽ ​െപാതിഞ്ഞ നിലയിൽ ആണ്​ ഇൗ സ്​ത്രീ വഴിയരികിൽ കിടന്നത്​. ഈ ദൃശ്യങ്ങൾ കണ്ടെത്തിയ പൊലീസാണ് ആംബുലൻസ് വിളിച്ച് സ്ത്രീയെ ആശുപത്രിയിൽ എത്തിച്ചത്. ചികിത്സയിലിരിക്കെ ഇവർ മരിക്കുകയും ചെയ്​തു. അമ്മയെ ഉപേക്ഷിച്ച്​ മരണത്തിലേക്ക്​ തള്ളിവിട്ടതിന്​ മകൻ വിശാലിനെതിരേ കേസെടുത്തതായും സംഭവത്തിൽ കർശന നടപടി സ്വീകരിക്കുമെന്നും ഡി.സി.പി. അനുപ് സിങ് പറഞ്ഞു.