എം.എൽ.എമാർക്ക്​ പത്ത്​കോടി വാഗ്​ദാനം ചെയ്​തു; ബി.ജെ.പിക്കെതിരെ ആരോപണവുമായി ആംആദ്മി

ന്യൂഡൽഹി: ബി.ജെ.പിക്കെതിരെ കുതിരക്കച്ചവട ആരോപണവുമായി ആംആദ്മി പാർട്ടി രംഗത്ത്​. ഡൽഹി എ.എ.പി, എം.എൽ.എമാർക്ക്​ ബി.ജെ.പി പത്ത്​ കോടി രൂപ വാഗ്​ദാനം ചെയ്​തെന്ന്​ എ.എ.പി നേതാവും ഡൽഹി ഡെപ്യൂട്ടി മുഖ്യമന്ത്രിയുമായ മനീഷ് സിസോദിയയാണ്​ ആരോപിച്ചത്​.

ബി.ജെ.പി മുമ്പും എ.എ.പി എം.എൽ.എമാരെ വിലകൊടുത്തു വാങ്ങാൻ ശ്രമിച്ചിരുന്നു. അന്ന് ജനങ്ങൾ അവർക്ക് കൃത്യമായ മറുപടി നൽകി. ഇത്തവണയും സമാനമായത്​ സംഭവിക്കും വികസന പ്രശ്നങ്ങൾ ഒന്നും എടുത്തുകാണിക്കാൻ ഇല്ലാത്തതുകൊണ്ടാണ് ബി.ജെ.പി കുതിരക്കച്ചവടത്തിന് മുതിരുന്നതെന്നും സിസോദിയ മാധ്യമങ്ങളോട് പറഞ്ഞു​. ​.

40 തൃണമൂൽ എം.എൽ.എമാർ ബിജെപിക്കൊപ്പമുണ്ടെന്നും ബി.ജെ.പി ജയിച്ചാൽ തൃണമൂൽ ശൂന്യമായിപ്പോകുമെന്ന പ്രധാനമന്ത്രി നരേന്ദ്ര മോദിയുടെ പരാമർശത്തെയും സിസോദിയ വിമർശിച്ചു. ഇത്തരം പരാമർശങ്ങൾ പ്രധാനമന്ത്രിക്ക് യോജിച്ചതല്ല. ഇന്ത്യ ജനാധിപത്യ രാഷ്ട്രമാണ്​. മോദി പ്രധാനമന്ത്രിയായത് ജനാധിപത്യത്തിലൂടെയാണ്​. അത്​ മോദി മനസിലാക്കണമെന്നും അദ്ദേഹം വ്യക്​തമാക്കി.

അതേസമയം സിസോദിയയുടെ ആരോപണങ്ങൾ തള്ളി ബിജെപി രംഗത്തെത്തി. തെരഞ്ഞെടുപ്പിൽ പരാജയപ്പെടുമെന്ന് ബോധ്യമായതോടെ തെരഞ്ഞെടുപ്പ് അട്ടിമറിക്കാനാണ് എ.എ.പി ശ്രമിക്കുന്നത്​. വിചിത്രമായ ആരോപണങ്ങൾ ഉന്നയിക്കുന്നത് മാധ്യമ ശ്രദ്ധ നേടാനാണെന്നും അരവിന്ദ് കെജ്രിവാളിന് എ.എ.പി എംഎൽഎമാരുടെ വിപ്ലവം തടയാനാകുന്നില്ലെന്നും അതിനാലാണ് അവർക്കുള്ളിലെ പ്രശ്നങ്ങളിലേക്ക് ബിജെപിയെ വലിച്ചിഴയ്ക്കുന്നതെന്നും ബി.ജെ.പി. വക്​താവ്​ ഗോയൽ പറഞ്ഞു.